среда, 17 сентября 2014 г.

Кыдзи коми сёян видлалім

Талун поштаысь аддзи со татшӧм юӧр - корӧны "Таплиани" ректоранӧ видлыны коми сёян. Пыр жӧ и звӧниті, ӧд аски сэсся кадыс оз ло сэтчӧ ветлыны. Окота абу сёйны, а тӧдмавны, мыйӧн вермасны шензьӧдны менӧ.

Меным пыр жӧ эз во сьӧлӧм вылӧ гижӧдыс - "презентация блюд Коми края и Русского Севера". Позьӧ чайтны, мый дасьтысьӧны петкӧдлыны оз коми сёян, а Коми муын мукӧд олысьлысь - и чиганлысь, и армяналысь, и грузинлысь, и с.в.... Коднӧ нӧшта тані олӧ?

Мунтӧдз Контактысь лыдди, мый вӧзйӧны видлыны. Медводз, кыдзи филологлы, син улӧ усины коми кывъясын ӧшыбкаыс: "чӧскыд чериись сёянтор", "волалӧм кӧр яй", "серкни", "картопеля тшак" и уна мукӧдтор.... 
Квайт пыдди корисны 7 кежлӧ. Воим кыкӧн пикӧд. Паныдаліс зон, вӧня, дӧрӧмыс йӧзкостсалань мунӧ, нуӧдіс пызан дорӧ. Сэсся, кыдзи тыдовтчис, микодьыс чукӧрмис морт кызь, а тӧрӧ сэтчӧ квайтымын гӧгӧр. Этша жӧ.

Недыр мысти матыстчис ныв-опициант, козьналіс пувъя джем, вӧзйис бӧрйыны кыксьыс мыйкӧ ӧтитор - чериа либӧ яя сет. Бӧрйи аслым чериа коми сет. Сет - тайӧ абу коми кыв, кӧть матын юргӧ: 
Виччысигмоз тӧдмасьышті пызанвывнас. Синмӧй бара пысасис менюын кыв дзугӧмӧ: "ижмаса", "пекіль", "пӧкъйӧн рудзега"...

Минута мысти вайисны меным блюдо: черинянь, шаньга, изьваса чери пекиль, сир пӧкъя блин, 
сола кӧчан, лукйӧн сола сьӧмга, еджыд винаа чӧскыд соус, муртса мырпома ликёр да "Асьядор" (мыйла СЛВЗ-ыд сорсис ним гижигас?!) курыд юантор. Со тадзи тасьтіас тӧрис:
Колӧ шуны, мый тасьтісьыс ме сёйи ставсӧ. Мода абу мыйкӧ кольны. Блинсӧ ковмис Ёгор пилы сетны - мыйкӧ мӧдтор сылы эз кажитчы. 

Тайӧ коми сет дорас содтӧд босьті нӧшта на нӧкъя блин (тӧдмалӧй кодлы), пувъя морс да нӧкъя-лукъя сола тшак. 
Тэрмася висьтавны - ставсӧ ньылышті.

Медым эз вӧв гажтӧм, ичӧтик сценаын сьылісны: медводз рочӧн, а сэсся комиӧн. Эг дзик пыр, но вочасӧн гӧгӧрвои, мый роч акцента мужичӧй сьылӧ "Катшасинъяс" джаз стильын. Видлі гижны (качествоыс абу ёна бур):
Мукӧд кывсӧ ачым ӧдва гӧгӧрвои, но рочыдлы шогмас. Татшӧм жӧ ногӧн мужичӧйыд сьыліс "Уна нывъяс лэччисны", "Пелысь". А сэсся пуктісны Михаил Бурдинлысь сьыланкывъяссӧ, тырмас пӧ. Чайта, шылад гижысь да сьылыськӧд вӧлі сёрнитчӧма да мынтысьӧма.  

Сьыланкывъяс бӧрын петкӧдісны торъя пуантор: пуӧм кӧчан юр, кытчӧ содтӧма кӧр яй да тшак. Быдӧнлы вичмис торъя тасьті. Зэв эськӧ чӧскыдтор, но мен яй кындзи сэсся нем эз кылав:
Пиӧй мудзис, кутіс вӧзйысьны, та вӧсна дженьдӧдыштім рытпукнымӧс (9 рытӧдз артыштӧма вӧлі рытыс), тэрмӧдлыштім опицианттӧ. Вайис мунысьяслы льӧм кӧра десерт.
Муні сэтысь да куті мӧвпавны, мый оз тырмы менюас: окота аддзыны йӧла тшай, кисель, пӧтка (сьӧла, тар) яй, кӧч яй, вотӧса пӧжасъяс, ляз.

Колӧ ошкыны ТАПЛИАНИ ресторансӧ водзмӧстчӧмысь, бур уджӧ босьтчӧмысь, но видыштны найӧс, кодъяс комиӧдісны блюдояссӧ - уна ӧшыбка. Чайта, найӧс удитасны мӧдысь кежлӧ веськӧдны. 

Пызан вылын куйліс торъя буклет коми кухня йылысь. Лыдди да мукӧдторйыс жугыльмӧдіс. Со, шуам, гижӧны, мый коми йӧз нянь вӧлі пӧжалӧны БОРЩЕВИК содтӧмӧн, мый комияс эз сёйны кӧч яй да стерлядь. Ӧні кӧ кодкӧ кывлас, бон-бус пинялас тайӧ текстсӧ гижысьсӧ.

Локтасны кӧ гӧсьтъяс да корасны нулыны кутшӧмкӧ ресторанӧ видлыны коми сёян, нуӧда сэтчӧ. Кута лача, мый налӧн менюысь оз бырны тайӧ блюдоясыс.

Комментариев нет:

Отправить комментарий