суббота, 4 октября 2014 г.

Юркарса Райда

Локтан вежонӧ лоӧ Сыктывкарса коми нывъяс пӧвстын "РАЙДА" конкурс. Юркарын вермысь нывка кутас дорйыны Сыктывкарлысь нимсӧ республикаса "Райдаын".

Коді оз тӧд либӧ вунӧдіс, казьтышта, мый медводдзаысь коми нывъяс пӧвстын республикаса мичлун конкурс вӧлі 2006 воын. Таво - витӧдысь нин лоӧ.

Конкурссӧ панысьӧн вӧлі "Коми войтыр" ӧтмунӧм. Юркарын вермасьӧмсӧ век на нуӧдліс "Коми войтырлӧн" Сыктывкарса юкӧн да Сыктывкарса коми культура шӧрин.

Конкурсӧ пырӧдчас некымын ныв. Ассьыныс кужанлунсӧ петкӧдласны витысь: ас йылысь висьталігӧн, сьылан-йӧктан сям да коми обряд петкӧдлігӧн, карнанӧн ветлӧдлігӧн да вочакыв сетігӧн.

Видзӧдлыны кӧ воддза вося конкурсъяс вылӧ, позьӧ казявны, мый юркарса тшупӧдын вермысьлы век на мойвиліс: 2006 воын Наталья Чаланова республикаса конкурсын лои мӧдӧн (сетӧны "Катшасин" ним), 2008 воын Яна Сажина - коймӧдӧн ("Пӧлӧзнича" ним), 2010 воын Анастасия Ветошкина (ӧні - Михайлова) - коймӧдӧн жӧ, 2012 воын Анастасия Артемьева - бара жӧ коймӧдӧн.

Коді вӧлі вермысьӧн "Райда" конкурсъясын, позьӧ Коми википедияысь лыддьыны. Эг на эштӧд гижӧдсӧ, а регыдъя кадӧ ковмас бара на содтавны, ӧд ӧшым тӧлысь 4-5-ӧд лунъясӧ республикаса "Райдаыс" лоас чужанінын, Кулӧмдінын.

И сідз, Сыктывкарса нывъяс пӧвстын ордйысьӧмыс мунас йирым тӧлысь 9-ӧд лунӧ, четвергӧ, "Октябр" шӧринын, квайт рытсянь. Волӧй "Юркарса Райда" вылӧ, тшӧтш донъялӧй. Гашкӧ, корсьысьяс гӧтырпусӧ аддзасны.

Комментариев нет:

Отправить комментарий