четверг, 30 апреля 2015 г.

Вӧлӧкӧвӧйын вежон

Коми фольклор чукöртöм могысь уналаö удитi волыны бöръя дас вит вонас. Вöлi миян республикалöн районъясын, Перым-Коми кытшын, Из сайын — Казымса изьватас ордын. Колян во мойвиис воöдчыны Вöлöкöвöйöдз — Яран асвеськöдлан кытшын войвывса ичöтик грездöдз.

Сэтчöдз ветлыны отсалiс Яран асвеськöдлан кытшса этнокультура шöрин. Сэнi уджалысь, коми юкöнöн веськöдлысь О.М. Коцюбанская ас кадö вöзйис ветлыны ылыс грездъясö, кöнi олöны изьваса комияс. Культура юкöнын зiльысьяслы колöны вöлi ас кытшын чукöртöм фольклор гижöдъяс, медым на вылö позис мыджсьыны гажъяс дасьтiгöн. Со и корисны менö отсöг вылö. Медым войвывса комияслысь олöм-вылöмсö паськыдджыка петкöдлыны Комиын, дум вöлi телеканалысь кодöскö чукöстны, но сьöмыс этша налöн да, эз кöсйысьны ветлынысö.


Кык вежонся туйыс Комиысь туялысьяслы — Кыв, литература да история институтысь этнограф Валерий Шараповлы да меным — пансис Сыктывкарса аэропортын. Лöддза-номъя тöлысьö самолётöн войвывлань лэбим да шензим, кыдзи öшинь сайын поводдяыс вежсьö. Миянын вöр-ваыс ловзис-вежöдiс нин, а войвывланьын кöнсюрö ты-юыс вöлi йи улын на.

Наръян-Марын Ольга Михайловнакöд паныдасим да мöд лун кежлö план дасьтiм — Вöлöкöвöйö мунтöдз вöлi на кык лун. Шуим чукöртны карын олысьясöс, кодъяс ветлöны "Печорянка" сьылан котырö. Буретш О.М. Коцюбанская сiйöн веськöдлö. Сэтчö пырöны олöма нин мада изьвасаяс, кодъяс кöр дорын чужисны-быдмисны да уджалiсны, а сэсся Наръян-Марö овмöдчисны. Чомйын лунпукалöмыс кöть и öдйö лэбыштiс, бур казьтылöмъяс колины. Удитiм и кöр яя шыд сёйны, пым тшай юны, сьылыштны да кöр дор олöм казьтыштны. Нимкодь вöлi Домна Фёдоровна Артееваöс выльысь аддзывны да кывзыны: сылöн быд кыв шусьöг туйын. Сы йылысь колö кино дасьтыны.

Наръян-Марса аэропортын чуймöдiс билет вузаланногыс. Кытшö пырысь сикт-посёлокö билеттö, вöлöмкö, водзвыв оз вузавны. Аэропортын ковмис асывсянь сулавны да виччысьны: чукöрмас кö морт дас — лэбзьöдасны Ан-2 самолётöн, кызь кö — Ми-8 вертолётöн. Оз кö чукöрмы йöзыс, рейсыс оз ло. А уна грезд-посёлокö самолётыс лэбзьывлö вежоннас öтчыд! Он кö веськав мунны, ковмас бара вежон пукавны да кевмысьны, медым унджык лэбалысьыс вöлi.
Бöръя здукöдзыс майшасим, сюрас оз билетыс, лоас оз самолётыс. А ог кö вермöй мунны, мый кутам вöчны Наръян-Марын матысса дас лунас? Но миянлы мойвиис, да вертолётöн петiм туйö.
Тундратi лэбам, öшиньö дзоръялам. Улын юяс быд ногыс чуклялöны-гартчöны-оръясьöны... Сьöкыд тайöс ас кывйöн висьтавны, нöшта на сьöкыдджык серпасавны. Кутшöмкö кад мысти гöгöрвоим — дзик тадз жö вожалöны кöр сюръяс. И буретш татшöм жö серпас аддзылiм повойникысь — изьваса невесталöн юр кышöдысь.

Вертолёт öшиньсянь Вöлöкöвöй тыдалiс бура — луна бана, джуджыд нöрысын, пожöма ягын, ю бокын. Му вылын унаöн жуисны — виччысисны рöдвужсö, пошта, пенсия. Вежоннас öтчыдысь волысь вертолётыд — ыджыд лоöмтор. Миян локтöдз на ставнас грездыс тöдöма, мый Комиысь туялысьяс воöны. Быдöнлы окота вöлöм видзöдлыны.

Миянöс, кык мужичöйöс, клубö овмöдiсны. Медводз тöдмасим отсасьысьяскöд, кодъяскöд быд лун ковмас паныдасьлыны, йöз дорö ветлыны. Oтисö на пиысь бура нин тöда. Людмила Евгеньевна Хозяинова клубын уджалö. Ачыс роч, орчча грездын чужлöма. Верöс сайö петöма да изьва кывйöн бура сёрнитны велалöма. Роч да коми сьыланъяс ливкйöдлö, уна сикас удж котыртö. Мöд отсасьысь — Тамара Октябриновна Филиппова, изьватас, чужлöма-велöдчöма да öнi уджалö-олö 40 км сайын орчча роч юрсиктын — Улыс Пёшаын. Сiйö локтöма бать-мам керкаас миянлы отсöг вылö.

Тайö кык мортыскöд сёрнитöм бöрын Вöлöкöвöй йылысь унджык тöдмалiм. Медводдза рытнас нин "вöлесьсэ" кытшовтiм: син улö усины пывсян ыджда важся керка, ломтас улысь кöрт бöчка, ракета коляс, джуджыд град.

Коми фольклор туялысьяслöн уджъясысь мен тöдса нин вöлi, мый 1960-1970 воясö тундратi келалiсны коми эпос корсьысьяс. Нималана фольклор туялысь, филологияса доктор Анатолий Микушевлöн веськöдлöм улын вöлi петавлöма некымын фольклор экспедицияö. А 1972-1973 воясö Вöлöкöвöйын уджалiс Юрий Рочев. Сылöн гижöдъясыс и лоины водзö туясьöмлы нырвизьöн.
Ас костын изьваса комияс грездсö Вöлэкевейöн шуöны. Сiйö пукалö Вöлöкöвöй ю вомлы паныд, Пёша юлöн веськыд берегын. Пёша ю Баренц саридзлöн Чёша губаö визувтö.

Медводдзаöн 1907 воын сэтчö овмöдчылöма пöрысьмöм изьватас, кодлы кöр видзысь пияныскöд сьöкыд нин лоöма ветлыны. Сылöн нимыс Антип Иванович Терентьев. Ов сертиыс и овмöдчанiнсö кутöмаöсь шуны — Терентьевскöй выселок, Терентьевка, Терентьевскöй. Грездыс вöлöм пырö Пёша вöлöсьтö, öнi сiйö — Пёша сиктсöветын (тадзи Яран асвеськöдлан кытшын муниципальнöй юкöнъяс шусьöны). Миян волiгöн медводдза олысьыслысь керка коляссö петкöдлiсны, удитöмаöсь нин пес вылö лэдзны. Элясисны на, öдва пö пилаыс керъяссö шöралiс.
Олысь лыдыс водзö кутiс содны коллективизацияысь пышйысь изьваса кöр видзысьяс весьтö. Овмöдчисны сiдзжö орчча грездъясысь рочьяс, кöр дорысь мунöм яранъяс. Айму вöсна Ыджыд тыш кадö татчö воисны удмуртъяс, кодъяс гöльлун вöсна чужанiнсö эновтiсны да вербовка серти медасисны Войвылö чери кыйны. Тадзи Пёша юбердса грездъясö веськалiсны Веретеньковъяс, Владыкинъяс, Главатских.

2010 воын Вöлöкöвöйын вöлöма 105 олысь, 2014 воын — 60 гöгöр, ёнджыкасö олöма нин войтыр. Грездын эм культура керка, библиотека, кык морта начальнöй школа, челядьöс видзанiн, ас вылас уджалысьлöн да сельполöн вузасянiнъяс.
Вежон олiм Вöлöкöвöйын да уна ордö удитiм волыны, медсясö пöрысьджыкъяс дорö, кодъяс став олöмсö коллялiсны кöр дорын. Быдöнлысь удж йывсьыс юасим, кытысь налöн пöль-пöчыс воисны. И öд некод эз шу, мый оз тöд. Чорыда паметяныс висьталöмыс кольöма. Содтасны на, кыдзи, кутшöм туйястi да кымынöн воöмаöсь Коми муысь. Со, шуам, Т.О. Филиппова висьталiс семьяпытшса предание: кор прадед овмöсас уна кöр кулöма, сiйö шуöма Изьваысь пышйыны. Кепысьö нянь сюйöма да бергöдчöмöн шыбитöма: кодарланьö кепысьыс усьöма, сыланьö и кöръяснас вöрзьöдчöма. Тадзи Вöлöкöвöйланьö воöма. Грездын олысьясысь кодсюрö рöдвужыс дорас на ветлывлöмаöсь, кор кадыс да вынэбöс вöлöма.

Зiлим аддзыны сiйö йöзсö да налысь рöдвужсö, кодъясöс 1970-öд воясö коми фольклор туялысь Ю.Рочев юасьлiс. Сöмын öти морт сюри, сэки томöн на вöлöма — лыддьысянкыв висьталöма. Паськыда корсьысьöмöн аддзим Рочевлöн сiдз шусяна информантъяслысь фотоснимокъяссö. На лыдын — яран эпос сьылысь Фёдор Иванович Хатанзейскийлысь. Иöзлöн висьтавлöм серти, сiйöс Кардорö и Наръян-Марö корлывлöмаöсь. Сэтшöм кузя сьывлöма, мый йöзыс удитлöмаöсь узьыштны. Чуймöмöн тöдмалiм, мый Вöлöкöвöйын овлöма Тандзе Маръялöн племянникыс — Тимофей Рочев, кодлы изьваса веськöдчысь 1953 воын ассьыс фотокарточкасö мöдöдлöма.

Грездса некымын морт коймöд во нин олö Захарьин юбердса чомъясын, сэтчöдз 25 кымын километр. Кор тöдмалiм, мый сэнi 80 арöса кык нывбаба эмöсь, пыр жö сэтчö мöдöдчим. Миянöс сэтчöс кöр видзанногыс чуймöдiс. Вöлöмкö, бöръя воясас кöр видзысьяс оз нин кыскавны чомтö. Некымын во сайын найöс öтилаö сувтöдöмаöсь, на бöрся пöрысьджыкъясыс видзöдöны-дöзьöритöны, а томъясыс кöр бöрся палаткаöн ветлöны.

Чомъясöдз туйсö петкöдлыны кöсйысис ар нелямына Володь Терентьев. Сылöн сэнi мамыс да вокыс олöны-уджалöны. Медводз Вылыс Пёшаöдз машинаöн лыа туйöд воöдчим. Сiйöс дзик на неважöн ас вынöн вöчöмаöсь. Сэсся вöр туйтi шалсйöдiм, шойччигмоз куим час нюртi собим — чуклялiм, вутшкысь вутшкö чеччалiм. Мунiгмоз ылысянь кöръясöс видзöдiм. Миянöс колльöдысьяс гöгöрвоöдiсны, кöръясыс пö тöрыт на вуджисны Пёша юсö да мунiсны войвывлань, Из вылö (тадзи Тиман изсö шуöны). Лунöн водз чомъясас волöмаöсь и пастукъяс — найöс ми эг жö суöй. Чом дорын миянöс виччысисны нин — сотöвöй телепоныд нюр шöрад зэв бура кыйö, грездсянь налы удитiсны юöртны. Воча кöзяйкаяс петiсны, тöдмасьöм бöрын косьтысим да бурпöт сёйим. Шойччытöг зiля уджö босьтчим,  кык Марусяöс юасим — Мария Алексеевна Терентьеваöс да Мария Александровна Выучейскаяöс. Кык "монькаöс" (моньясöс) юасим и öтлаын, и торйöн. Кыкнанныс петкöдлiсны ас вöчöмторъяс — пим, сöвик, парка, тучу да падку.

Миянлы вöлi быдтор интереснö — и серыс, и вурсянногыс. Ставсö снимайтiм да гижим. Жаль сöмын, пöрысьладорыс кык моньлы Вöлöкöвöй ковмис эновтны да гöтыртöм пиян дорас бöр чомö локны. Ӧнiя кадö пö гöтырпутö сьöкыд аддзыны, некод оз кöсйы кöр дорö локны.

Куим чомйын миян волiгöн вöлi вит морт. Вочасöн найö паськöдчöны да надея кутöны бур олöм вылö. Дасьтöмаöсь неыджыд град, кытчö пуктöмаöсь лук да мукöд турун, тшупöны пывсян. Менам видзöдлас серти, на дорын позьö на вöлi вежон овны да олöм-вылöм йывсьыс казьтылöмсö гижавны, но рытнас ми сэтысь мунiм — грездын сёрнитчöма нин вöлi мукöдыскöд паныдасьлыны.
Мойвиис чукöртлыны культура керкабердса "Лысва" сьылан котырöс. Асшöр коллективсö 1970-öд воясö на лöсьöдлöмаöсь. Сэки Вöлöкöвöйö локтöма Изьва районса Вертепысь том велöдысь Мария Андреевна Таратина, кодi ливкйöдлыны кöсйысьясöс котыртöма, Комиысь сьыланкыв чукöръяс вайöма. Ӧнiя кадö котырас сизим морт, сьылöны изьва ногöн авторъяслысь да йöзкостса коми сьыланкыв-частушка.

Вöлöкöвöйын да чомйын ставсö 18 мортöс гижим. Быдöнöс снимайтiм, диктофонö да видеокамераö гижим. Унджыкыс изьва кывйöн сёрнитiсны — весиг рочьяс, яранъяс да öти удмурт ань, кодi мамыскöд ичöтöн веськалöма ылi войвыв муö.
Вöлöкöвöйысь мунöм водзвылын чукöртлiм грездын олысьясöс рытпук вылö. Асланым вежонся удж да кывкöртöдъяс йылысь висьтасим, бура примитöмысь аттьöалiм. Вöзйим грездысь петан туй бокын сюръявывса роч гижöд дорö содтыны изьва кывйöн "Видя оланныд" да "Бур туй". Корим клубын музей лöсьöдны да важся эмбур чукöртны, а медводдза олысьыслöн важ керка водзас торъя сюръя сувтöдны да гижны, мый танi 1907 воын А.И. Терентьев медводдза керкасö сувтöдöма.

Наръян-Марö воим да некымын лун изьваса фольклор водзö чукöртiм. Зэв бур казьтылöмъяс менам колины тайö ветлöмсьыс. Быд лун миянöс, гöсьтъясöс, номсöдлiсны — пуöмöн, пражитöмöн, косьтöмöн да солалöмöн дас сикас чери да пöтка яй видлiм. Нимкодь, мый няня-сола войтыр дорö бара на лöсьöдчам ветлыны.

Статьясӧ йӧзӧдӧма "Коми му" газетын (2015 во, 16 №, косму тӧлысь 23-ӧд лун)

Комментариев нет:

Отправить комментарий