Шуда котыр

Сыктывкарын коми бать-мам «Шуда котырӧ» ӧтувтчисны. 

Сійӧ босьтчис уджавны «Коми войтыр» ӧтмунӧмлӧн Сыктывкарса юкӧн бердын. Клуб лӧсьӧдӧм вылӧ ачыс олӧмыс йӧткыштіс. Карса олӧм петкӧдлӧ, мый комиӧн сёрнитысь челядьлы пӧшти некӧн чужан кывнас вӧдитчыны. Гежӧда овлӧны коми кыв урокъяс школаын либӧ челядь видзанінын – со и ставыс.

Медым позис вӧдитчыны коми кывйӧн паськыдджыка, коми культураӧн тӧдмасьны, вӧлі лӧсьӧдӧма «Шуда котыр». Медводдза чукӧртчӧм выльвося гажлы вӧлі сиӧма. Сійӧс дасьтісны да нуӧдісны «Коми войтыр» ӧтмунӧмлӧн Сыктывкарса юкӧнӧ пырысьяс. Ӧшым тӧлысь 27-ӧд лунӧ 40 гӧгӧр челядь да налӧн бать-мам чукӧртчылісны Коми республикиса Ёртасян керкаӧ. Ныв да зон ворсӧм пыр отсалісны Лымнывлы Ёмаӧс вермыны да Кӧдзыд пӧльӧс мездыны. Посниулов коз пу йылысь сьыланкыв сьылісны, гажа коми шылад улӧ йӧктісны, Ёмакӧд «Синтӧм гораньысь» ворсісны да выльвося кывбуръяс висьталісны, мыйысь, дерт жӧ, налы вичмис Кӧдзыд пӧльсянь юмов козин.

Выльвося гажлы сценарий дасьтіс Анастасия Михайлова. Лымнылӧс ворсіс Наталья Чаланова, Ёмаӧс – Наталья Шахова, Кӧдзыд пӧльӧс – Ӧльӧш Рассыхаев. Гаж котыртӧмын ӧтувъя уджнас веськӧдліс да диджеяліс Людмила Камбалова, а жыр корсьны отсаліс Маргарита Низовцева.

А со тані кык видео. Ёма бура ворсӧ - канму премиа позьӧ сетны:

Водзӧ вылӧ «Шуда котыр» кутас чукӧртчывны вонас некымынысь. Клубӧ пырысьяс кутасны корсьны и садик помалысьясӧс, кодъяс тӧдӧны коми кыв да кӧсйӧны Коми национальнӧй гимназияын велӧдчыны, кӧні комисӧ велӧдӧны кыдзи чужан кыв. «Шуда котырлӧн» Контакт везйын восьтӧма торъя котыр (http://vk.com/club107387067).