Медводдза шаньга

«Шуда котырӧ» пырысьяс неважӧн чукӧртчылісны да пӧжалісны чӧскыд кӧра шаньгаяс. Челядькӧд ӧтвыв пӧжасьны вӧзйис Людмила Камбалова. Вель дыр мӧвпалім, кӧні да кор паныдасьлыны. 

Кодлыкӧ кадыс эз лӧсяв, кодлыкӧ – кӧртымалӧмысь сьӧм мынтӧм. Медбӧрти юрсюянін сюри Юркарса коми культура шӧринысь. Директорыс, Ольга Аверина, та могысь весиг гортсьыс пӧжасян пач вайис.

Пӧжасьны воліс дас витысь унджык семья, ставнас морт нелямын. Ассьыс мастер-класс петкӧдліс Кулӧмдін районысь петлӧм ань Раиса Шахова, коді вайис пӧжасьӧм могысь став коланаторсӧ – рудзӧг пызь, кефир, маргарин, чипан кольк, сов, нырӧм картупель, тасьті-пань. Чукӧртчим да, пыр жӧ и босьтчис висьтавны, кыдзи няньшом кӧтны. Людмила Камбалова да мукӧд бать-мамыс юксисны ас гусяторъяснас – кодкӧ чипан кольк оз пукты, а кодкӧ весиг сакаралыштӧ. Челядь мудзлісны, но сэсся ӧдйӧ и ловзисны, кор найӧс корисны отсӧг вылӧ – гудравны няньшом. Пыр жӧ и чепӧсйисны некымын ныв-зон. Нӧшта на колысь синмӧн посниулов кутісны видзӧдны, кор Раиса Шахова петкӧдліс, кыдзи суктыны да быгльӧдлыны няньшом, вундавны гӧгыльяс, лэптавны сылысь бокъяссӧ да пуктавны нырӧм картупель. Висьталіс, кыдзи эжвайывсаяс да изьвасаяс шаньга гӧгрӧсмӧдӧны.

А сэсся челядьлы вӧзйисны пасьтавны юркышӧдъяс да еджыд партукъяс. Налы зэв кажитчис татшӧм вежсьӧмыс – вӧліны видзӧдысьясӧн, а лои пусьысьясӧн. Бать-мам дӧзьӧр улын ныв-зон окотапырысь нокисны няньшомсӧ, быгльӧдчисны, шӧрасисны. Пызан сайын азыма вӧчасисны и нёль арӧса нывкаяс, и ӧкмыс арӧса зонкаяс. Артмисны медводдза шаньгаяс. Быд шаньга торъяліс ыджданас, судтанас, но сэтчӧ вӧлі пуктӧма уна зільӧм. 

Недыр мысти пачысь ӧвтыштіс чӧскыд нянь кӧр. Челядьлы окота нин вӧлі видлыны пӧжассӧ, но мукӧд шаньгасӧ виччысигмоз медводз налы вӧзйисны шегъясьыштны да серпасавны пӧжассӧ. Медбур серпасалысьяслы вичмис юмов козин.

Ок и чӧскыд жӧ пӧжас петіс ныв-зонлӧн! Ас киӧн вӧчӧмыд кык пӧв дона! Пыр и кылӧдісны шаньгаястӧ тшаюйтігмоз.

Быдӧнлы мастер-класс котыртысь сетіс рецепт, медым и гортаныс бать-мам да челядь видлісны пӧжасьны да эз вунӧдны коми шаньгаяс.

Казьтыштам, мый «Шуда котыр» клуб чужис колян во Сыктывкарын, ӧтувтӧ коми семьяяс.