четверг, 21 апреля 2016 г.

Юркарса администрациякӧд паныдасьлім

Тӧрыт "Коми войтыр" ӧтмунӧмлӧн Сыктывкарса юкӧнӧ пырысьяс паныдасьлісны Юркарса администрацияысь веськӧдлысьӧс вежысь да управлениеӧн юрнуӧдысьяскӧд. Сёрнитім сы йылысь, кыдзи олӧмӧ пӧртам 2015 вося Сыктывкарса коми войтырлӧн конференциялысь Резолюциясӧ.
Резолюция серти дасьтӧма план, кытчӧ пыртӧма 16 юалӧм. На гӧгӧр и сёрнитім. Карса управлениеяс серти, мукӧд мытшӧдыс разьӧма либӧ разьсьӧ на. Сідз, лӧддза-номъя тӧлысьын нин коми вӧралан календар кӧсйӧ сувтӧдны сэтчӧ, кытчӧ вӧлі индӧма колян вося шуӧм серти - "Авалон" да ЦУМ костӧ, Интернациональнӧй уличалы банӧн.

Коми кыв велӧдігӧн классъяс кутасны юкны вочасӧн: оз тырмы жыръяс, велӧдысьяс да сьӧм. Тавосянь классъяс юкасны Вылыс Максаковкаса 15-ӧд номера школаын, кӧні челядьыс велӧдчӧны ӧти сменаӧ, жыръясыс тырмӧны.

Гӧрд Затонын тавосянь босьтчасны дасьтыны смета, медым артыштны, кымын сьӧм ковмас 600 морта выль школа кыпӧдӧм вылӧ.

Лесозаводын 4-ӧд номера челядь видзанінын мӧвпалӧны восьтны "кыв поз" велӧданног серти котыр, но оз тырмы коми кывъя велӧдысьыс.
Гӧрд Затонын жӧ гожӧмӧдзыс помаласны ремонт, лоас пӧ шоныд, а Вылыс Максаковкаын восьтасны Сбербанклысь банкомат.

Сыктывкарсянь Вылыс Човйӧдз 24-ӧд номера автобуслысь маршрут нюжӧдӧм серти бара на ковмас виччысьны. Кыдзи лои тӧдса, автобуслӧн бӧръя сувтанінсяньыс сизим километра сайын нӧшта на эм олан керкаяс, сэтчӧдз автобус оз ветлы. Ылӧджык кутас ветлӧдлыны автобусыс сы бӧрын, кыдзи дзоньталасны туй, би сюръяяс, вӧчасны гудӧк-автобус бергӧдчанін да сувтанін.

Сӧстӧм ва юны кӧсйысьяслы ковмас виччысьыштны. Канализацияысь петысь васӧ Гӧрд Затонын кутасны сӧстӧммӧдны вочасӧн - тавосянь дасьтасны документациясӧ сӧмын.

Ӧтвыв кутам уджавны Киров парклӧн Вадорсӧ выльмӧдӧм серти.

"Коми войтырлӧн" Сыктывкарса представительствосянь юӧртім жӧ, мый вӧчӧма. Водзӧ кутам нуӧдны удж, медым корсьны Коми национальнӧй гимназиялы медводдза классӧ мунысьясӧс, кодъяс кутасны коми кывсӧ велӧдны кыдзи чужан кыв; висьталім ассьыным вӧзйӧмъяснымӧс, кыдзи комиӧдны да мичмӧдны юркарнымӧс, кыдзи бурджык нуӧдны планын индӧм мероприятиеяс.

План серти удж мунӧ, чӧв ог пукалӧй. Юркарса администрациякӧд ӧти кывйӧ воим.

Комментариев нет:

Отправить комментарий