Спиридоновлы сиӧм лыддьысьӧмъяс

Коми республикаса Юралысь бердын Искусствояс гимназияын нёльӧдысь нуӧдісны Спиридоновлы сиӧм регионъяскостса лыддьысьӧмъяс. Чукӧртчылісны докладъясӧн велӧдчысьяс и велӧдысьяс. Конференцияыс сиӧма Коми мулӧн медводдза Юралысь Юрий Алексеевич Спиридоновлы, коді веськӧдліс республикаӧн 1994-2001 воясӧ. Сылысь нимсӧ жӧ новлӧ Искусствояс гимназия.

Воссьытӧдзыс удиті гимназияса пӧжасӧн чӧсмасьны да тӧдмасьны ас киӧн вӧчӧмторъясӧн. Велӧдчысьяс, вӧлӧмкӧ, серпасъяс подулас лэдзӧны унасикас календар - мича видзӧдсьӧ и зэв аслыспӧлӧс. Мӧдлаысь татшӧмсӧ он аддзы.

Конференциялысь уджтассӧ видзӧдігӧн казялі, мый ме кындзи секцияяс уджӧн кутасны веськӧдлыны миян институтса уджалысьяс - В.А.Лимерова, Г.В. Пунегова, М.В. Хайдуров, Л.Сурнина. Со ташӧм топыд, вӧлӧмкӧ, Кыв, литература да история институтлӧн гимназиякӧд йитӧдыс.

Лыддьысьӧмъяс воссисны кончертӧн. Петкӧдчисны гимназияса челядь - ворсісны скрипкаӧн, фортепианоӧн .

Президиум пызан сайын пукалысь Ю.А. Спиридоновлӧн дӧва Г.Медуха сетіс гимназияса медбур велӧдчысьяслы Спиридонов нима стипендия. Бур ышӧдантор!

Россияса академик Михаил Павлович Рощевский - Ю.А. Спиридоновлӧн важся да бур ёрт - пасйис, мый сӧмын искусствояс гимназия видзӧ медводдза Юралысьлысь бур паметьсӧ, нинӧм вылӧ видзӧдтӧг. Унаӧн сы йылысь оз и казьтывлыны.

Коми республикаса Йӧзӧс велӧдан, наука да том йӧз политика министр Н.А. Михальченкова кӧсйысис отсавны нуӧдны тайӧ лыддьысьӧмъяссӧ. Эзджык вӧв гӧгӧрвоана, мыйла 13-17 арӧсаяслы наука кывъясӧн висьталіс  "компетенцияяс" йылысь.    
 
Кывзім ӧти том велӧдчысьӧс, 5-ӧд класса висьталіс кристаллъяс артмӧм йылысь. Академик, дерт, видліс наука боксянь донъявны уджсӧ, корис юасьны да донъявны уджсӧ. Эгӧ лысьтӧй!

Минут комынӧн сёрӧнджык босьтчим уджавны секцияясын. Дас доклад ковмис ӧтнамлы донъявны "Менам ичӧт чужанін" секцияын. Сьӧкыдджык, дерт. Торйӧн нин сэки, кор уджъяссӧ водзвыв он тӧд. Колӧ и кывзыны, и гижыштны, и регламент сюся кыйӧдны.

Сёрнитысьясыс вӧліны искусствояс гимназияысь, Сыктывкарса университетбердса физмат лицейысь, Зеленечысь, Выльгортысь да Кебраысь. 

Уна удж вӧлі дасьтӧма бура. Сьӧкыд вӧлі бӧрйыны вермысьяссӧ. Коліс эськӧ куим морта жури.

Нёль докладчикӧс конференция кежлӧ дасьтӧма Людмила Лобанова: уджъясыс йитчӧмаӧсь Удораса фольклор традиция туялӧмъяскӧд.

Бура сёрнитіс Выльгортысь Дарья Вологжанина Сыктывдін районын кино петкӧдлӧм йылысь: 

Сылӧн арталӧм серти, районас 1940-ӧд воясӧ быд олысь шӧркодя 41-ысь ветлӧма кино видзӧдны. А телевизортӧ 1965 воын Нювчимын ӧтпырйӧ 60 морт ньӧбӧма.

Коймӧд места шедӧдіс Зеленечысь 7-ӧд класса велӧдчысьяслӧн уджыс. Палева Устина да Левчанова Настя висьталісны кузь чышъян йылысь:

Мӧд места сетӧма кык мортлы. Физмат лицейысь Клавдия Дуркина висьталіс чилимдінса Горка видзӧмын йӧзкостса паськӧмлӧн пай йылысь: 

Ӧні пӧ Чилимдін районас 13 вурсьысь, кодъяс заказ серти вермасны вурны важся ног паськӧм. Колӧ пасйыны, мый Клавдия бура кывзіс мукӧдсӧ да быдӧнлы сетіс юалӧм. Сёрнитігас удитіс и мукӧдлысь юавны, медым кыскыны аслас тема дорас вниманньӧсӧ. Быть колӧ татшӧм приёмсӧ пыртны велӧдчысьяслӧн уджӧ!

Мӧд места вичмис и Кебраысь Антон Куратовлы (10 кл.) сиктса библиотека история туялӧмысь:

Небӧгаинсӧ восьтлӧмаӧсь 1903 воын Флорентий Павленков сьӧм отсӧгӧн. 1947 восянь "изба-читальня" кутӧма шусьыны "библиотекаӧн". Ӧні сылӧн фондын 8448 небӧг, волӧ пӧ 525 лыддьысьысь, и налӧн лыдыс оз чин, кӧть и пыр этшаджык воӧ выль петасъясыс.

Медводдза места вичмис Йӧртӧмдінын Параскева Пекнича енмӧс пыдди пуктӧм йылысь удж. Искусствояс гимназияысь 10 класса велӧдчысь Виктория Тушканова пырӧдчыліс историяӧ да петкӧдліс ӧнія кадся традиция.

Уджъяссӧ видзӧдаліг да юасиг тыдовтчис, мый оз быд докладчик тӧд научнӧй литература, мый петіс эз ас районын да республикаын.