понедельник, 7 ноября 2016 г.

Выль жыр

Воддза вежонас кыпыда восьтісны Коми Республикаса войтырлысь Ёртасян керка. Сэтчӧ овмӧдчисны Коми муын уджалысь НКА-яс да  ӧтмунӧмъяс - белорусъяслӧн да украинечьяслӧн, немечьяслӧн да чувашъяслӧн, перымса комияслӧн да изьватаслӧн, и с.в. Сэні жӧ вичмӧдӧма "Коми войтыр" ӧтмунӧмлы жыр. Сыӧдзсӧ 2 жыр вӧлі каналан сӧветса 6 судтаын.



Фотоыс Владимир Прокушевлӧн.


Ёртасян керка восьтӧм кежлӧ жырсӧ неуна мичмӧдыштӧма, тыртыштӧма эмбурӧн. Ӧні эм уджалан да тшаюйтан пызанъяс, дас улӧс, ичӧтик шкапын небӧгъяс да козин-чачаяс, стенын Комилӧн мусерпас да ӧшиньын занавес пыдди ӧтмунӧмлӧн баннер. Жырйыс ыджыдкодь, та вӧсна кажитчӧ кушӧн на.


Лоас кӧ шӧрас морт даслы пызан - тайӧ бура кутас видзӧдсьыны.

Вӧльгым 4-ӧд лунӧ чукӧртчылім тайӧ жыръяс асланым челядькӧд. Кывсис, мый Коми муса Юралысь кутас видзӧдавны жыръяссӧ. Локтіг кежлас джоджас вӧлі вольсалӧма джодждӧра, пызанын куйлісны пӧжасъяс.


Час кык пукалім, варовитім, тшаюйтім да сёйим - челядьыдлӧн кынӧмыс ӧдйӧ сюммис. Кад колляліг моз да С.А. Гапликовӧс виччысиг моз зонъяскӧд (ниӧти нывка эз вӧв) ӧтвылысь шегъясим. Ворсігкостті и воисны чинаясыд. Пӧжасъясӧн сійӧс паныдалім, сэсся корим ворсыштны:

 

Эз кӧ миян челядьным, юралысьыдлы нем вӧлі петкӧдлыны. Корим, но эз ворс миянкӧд. Ме пӧ Шӧр Азияын ворслі жӧ.

Аттьӧ налы, коді пыраліс тшаюйтны. Натӧг эськӧ жырйыс дзик кушӧн коли.

Нӧшта ӧтчыдысь мӧвпышті сы йылысь, мыйла жӧ комияс оз кужны асьнысӧ котыртны да ӧтувтчыны, кӧть нин войтыръяслӧн Ёртасян лунӧ?

Комментариев нет:

Отправить комментарий