четверг, 1 декабря 2016 г.

Марпида

Челядь сад, кытчӧ котралӧ Ёгор пиӧй, пыр ветлӧ Национальнӧй музейӧ экскурсия вылӧ. Матын да, налы кивыв - подӧн минут вит тапиктыны. Сёрниясысь тыдовтчис, мый ветлывлӧны вӧр-ва да история юкӧнъясӧ, а Национальнӧй музейлӧн мукӧд отдел йывсьыс весиг оз тӧдны, кӧть эськӧ сэні тшӧтш дзолюкъяслы дасьтӧма ворсан-тӧдмӧдан уджтасъяс.

И со шуим "Шуда котыркӧд" ветлыны И.А.Куратовлӧн литературнӧй музейӧ, кӧні Люба Ануфриева кӧсйысис КОМИӦН нуӧдны Марпида саревна коми мойд серти экскурсия.

Чукӧрмис морт дас кымын челядь. (Медводз вӧліны сӧмын детинаяс!) Регыдъя кадӧ нин Марпида корӧм серти найӧ корсисны музейлӧн выліса судтаас небӧг, а сэсся ӧтвыв видзӧдалісны сэтысь серпасъяссӧ, тӧдмалісны коми фольклорысь персонажъяссӧ. Мукӧдсӧ тӧдісны.

Ёна окотапырысьджык челядьыд бергӧдлісны изки. Быдӧнлы (и меным весиг тшӧтш) окота вӧлі видлыны, но Марпида вӧзйис бӧрыннас изкисӧ бергӧдлыны, да корис водзӧ корсьны Марпида йылысь мойдсӧ.
Музейлӧн медыджыд жырйын, кӧні быдла боксянь ӧшалӧны небӧгъяса шкапъяс, Марпида вӧзйис челядьлы корсьны коми мойд небӧгсӧ. Некодлӧн эз вӧв кӧсйӧм кольччывны татчӧ вежон кежлӧ.

Видзӧдім "Чукля" мультфильм (сы йылысь, кыдзи коми вӧралысь сяммис мынтӧдчыны вӧрсаысь), но и сэтысь эз сюр мойд небӧгным.


Челядь пиысь некымынӧн петавлісны да лыддисны кывбур. Егор лыддис мамӧлы сиӧм кывбур, Аня (снимок вылын) и кывбур лыддис, и сьыліс, а сылӧн ичӧтджык вокыс йӧктыштіс на:

Кончертасьӧм бӧрти орчча жырйысь челядь корсисны перӧ да лупаӧн видлісны лыддьыны важся гижӧд:


Медым венны Ёмаӧс, Марпида вӧзйис иван-тшайысь лӧсьӧдны видзӧг. Иван-тшайсӧ шуӧны нӧшта на и войвыв тшайӧн, войвыв дзоридзӧн.


Быдӧнлӧн артмис со татшӧм сьыліӧ ӧшӧдан видзӧг:
Музейті водзӧ мунігӧн сюрис кӧрӧбка. Шыр пыдди перйим гумагтор - Ёма кырымасьӧма:
Музейысь став жырсӧ кытшовтім, но мойд небӧг эг и аддзӧй. И сэки Марпидасянь челядь тӧдмалісны, мый эм нӧшта ӧти восьттӧм ӧдзӧс. Сыланьӧ и котӧртісны ныв-зон да зіля камӧдчисны - муртса ӧдзӧссӧ эз жугӧдны.

Марпида дзуртӧмӧн восьтыштіс ӧдзӧс да бӧр крапкис. Сэні пӧ Ёма пукалӧ! Челядьыд лӧньыштісны. Мӧдысь восьтлӧм бӧрын Марпидаыд юӧртіс, мый Ёмаыд ичӧтмӧма. И сэки ставныс пырисны... :
Ёмаыд киад кутӧ вӧлӧм Марпида йылысь мойд, а ачыс шаньмӧма нин - весиг лэдзис мольӧдыштны асьсӧ:
А сэсся челядь кывзісны мойд ...
Мунтӧдз Люда Камбалова быдӧнӧс велӧдіс дӧраысь вӧчны аканьӧс:
Бура уджыштӧм бӧрын тӧдмасим музейса экспонатъясӧн, тшаюйтыштім, и весиг пызан дӧраас колим паметь вылӧ ас йылысь гижӧд.
Со тадзи "Шуда котыр" кад колляліс Ставмирса Мам лунӧ. А водзӧ вылӧ планын - выльвося гаж.

Бӧркыв пыдди: Алёна Нестерова тшӧтш гижыштіс музейӧ ветлӧм йылысь.

Комментариев нет:

Отправить комментарий