четверг, 29 декабря 2016 г.

Коми профессиональнӧй культура сӧвмӧдӧмын мытшӧдъяс

"Коми войтыр" ӧтмунӧмлӧн офисын паныдасьлім сёрнитны коми профессиональнӧй культура сӧвмӧдӧм йылысь.


Коми республикаса вужвойтырлӧн шылада-драмаа театрысь художествоа веськӧдлысь Светлана Гениевна Горчакова юксис аслас мӧвпъясӧн.


Коми профессиональнӧй культураын лоины кадръяс дасьтӧмкӧд мытшӧдъяс.

Ӧні кад кежлӧ зэв ёна оз тырмыны коми кыв тӧдысь артистъяс. Вель сьӧкыд лои корсьны школа помалысьӧс, коді тӧдӧ коми кыв да кӧсйӧ велӧдчыны да артиставны.

Сёрниын воим сэтчӧдз, мый школа помалысьяс асьныс оз тӧдны, кӧні позьӧ уджавны, тӧдан кӧ коми кыв да мыйӧн вермас чужан кывйыд отсавны.

Комиын уджалӧны искусствояс да культура колледжъяс, кӧні дасьтӧны культура керкаяслы, библиотекаяслы специалистъясӧс, но, вӧлӧмкӧ, том йӧзыд окотапырысьджык мунӧны аниматоръясӧн гажӧдны челядьӧс да верстьӧӧс корпоративъяс дырйи.


Сьӧкыдджык быдтыны театрса режиссёрӧс, кодлы колӧ тӧдны пыдісянь артисталан удж.

Кымын морт ӧні кадӧ гижӧ коми сьыланкывъяслы шылад? Морт кызь, буракӧ. А кымын на пиысь лыддьысьӧны профессиональнӧй композиторъясӧн да вермӧны пырны шылад тэчысьяслӧн Россияса котырӧ? Ньӧти! Вӧлӧмкӧ, налы туйыс тайӧ котырас тупкӧса. Со и артмӧ, мый асшӧр шылад тэчысьяслысь сьыланкывъяссӧ ливкйӧдлам Комиын и Рочмуын, а Композиторъяс котырӧ пырысьяслысь нимъяссӧ весиг ог тӧдӧй!

 Унатор йылысь на сёрнитім. Медым гӧгӧрвоны став мытшӧдсӧ да разьны найӧс, шуим паныдасьлыны культура, архив удж да туризм министркӧд да паськыдджыка та йылысь сёрнитны "Коми войтыр" ӧтмунӧмлӧн Исполком чукӧртылігӧн.

Комментариев нет:

Отправить комментарий