четверг, 16 февраля 2017 г.

Чужан кыв лунлы сиӧма

"Коми войтыр" ӧтмунӧм дасьтысьӧ пасйыны Чужан кывъяс лун да корӧ быдӧнӧс пырӧдчыны тайӧ уджас.


Урасьӧм тӧлысь 19-ӧд лунӧ (вӧскресенньӧ) 10 час 30 минутын корам тіянӧс Национальнӧй библиотекаӧ (Сыктывкар, Сӧвет ул., 13) гижны ӧтувъя коми диктант. Таво текстсӧ дасьтіс коми гижысь Алёна Ельцова. Сійӧ тшӧтш волас библиотекаӧ да .... (тайӧ гусятор).


Диктантсӧ кутас лыддьыны Сыктывкарса университетысь велӧдысь, филологияса кандидат Елена Остапова. Уджъяссӧ донъявны корим юркарса школаясысь коми кыв велӧдысьясӧс.

Коді оз удит (оз вермы) сэки, диктант позьӧ гижны Коми республикаса войтырлӧн Ёртасян керкаын (Ленин ул., 74-ӧд номера керка) урасьӧм тӧлысь 20-ӧд лунӧ, 17.00 часын.
 

Та кындзи, коді оз вермы волыны гижны диктант, Коми йӧзкостса радиокӧд да Коми йӧзӧдчан керкакӧд котыртам радиодиктант! Урасьӧм тӧлысь 20 лунӧ 17:00 часын Коми йӧзкостса радио кывзысьяс вермасны гижны диктантсӧ веськыд эфирын. Та могысь колӧ пырны www.юрган.рф/radio либӧ komimu.com сайтӧ. 

Радиодиктант гижысьяслы уджъяссӧ позьӧ мӧдӧдны Сыктывкарса коми культура шӧринӧ (167000, Сыктывкар, Бабушкин ул., 31-ӧд №-а керка) либӧ komi.vojtyr@mail.ru адресӧ.

Ӧні кежлӧ тӧдса нин, мый Ӧтувъя коми диктант "Коми войтыр" ӧтмунӧм зільӧм-ӧтсӧгӧн котыртасны Кулӧмдін, Кӧрткерӧс, Удора, Сыктывдін да Емдін  районъясын, Уква да Сосногорскын, а сідзжӧ Москваын, Вежа Петыркарын да весиг Наръян-Марын.

Диктант гижысь лыдыс да сикт-кар лыдыс лоӧ тӧдса сёрӧнджык.


Урасьӧм тӧлысь 21-ӧд лунӧ - Чужан кывъяс лунӧ - Сыктывкарса представительство, Коми культура шӧрин да том коми войтырлӧн "МИ" котыр лӧсьӧдӧны ывлавывса да ӧтуввез-акцияяс.
Ӧтуввез акциялӧн могыс - тыртны Контакт-вез коми гижӧдъясӧн: кывбурӧн (быть индыны авторсӧ), шусьӧгӧн, нӧдкывйӧн и с.в. Позьӧ вӧчны видеороликъяс. Быд кывбур водзын колӧ пуктыны "ЧУЖАН КЫВ ЛУНӦН!" гижӧд да ӧта-мӧдлысь кывбуръяссӧ йӧзӧдны ас лист бокӧ либӧ мукӧд котырын, мыйӧн веськӧдланныд.


Коми культура шӧринын уджалысьяс да "МИ" котырӧ пырысьяс петасны ывла вылӧ, медым шыӧдчыны комиӧн мунысь-ветлысь дорӧ, висьтавны налы Чужан кывъяс лун йылысь да чолӧмавны найӧс праздникӧн, а сідзжӧ сетны коми газет-журналъяс да комиа-роча разговорник. Корам матыстчывны Коми культура шӧрин дорӧ урасьӧм тӧлысь 21-ӧд лунӧ 12.45 кежлӧ. А Степан изъэрдын гижасны краскаӧн лым вылӧ чолӧмалан кывъяс да лэдзасны енэжӧ шарикъяс.

Комментариев нет:

Отправить комментарий