понедельник, 20 февраля 2017 г.

Ӧтувъя диктант гижӧм йылысь

Тӧрыт Коми республикаса национальнӧй небӧгаинын гижим Ӧтувъя коми диктант.


Чукӧрмис морт 60. Тані вӧліны сыктывкарса университетысь студентъяс, искусствояс гимназияысь велӧдысьяс да велӧдчысьяс, школаса коми кыв велӧдысьяс.

Федерация сӧветысь сенатор Валерий Марков коймӧдысь нин пырӧдчӧ диктант акцияӧ. Шуис, мый гежӧда гижӧ комиӧн и кӧсйӧ тӧдмавны, бура-ӧ паметяс кольӧма грамматикаыс.
 
Аттьӧаліс локтысьясӧс диктант текст гижысь Алёна Ельцова. Мукӧдыс пӧ полӧны, гашкӧ пӧ, наукаын уджалан да, сьӧкыда гижӧмыд. Но гижысь кывъяс серти, ме пӧ зіли гижны кокниа да интереснӧя. Гижи пӧ медрадейтана кад - ар йылысь. Вӧзйис кывлысь мичсӧ кывны.
 
Диктораліс филологияса кандидат, сыктывкарса университетысь велӧдысь Елена Остапова. Колян во серти пӧ тайӧ текстыс ыджыдджык, уна правилӧ вылӧ эм кывъяс - и кыв гижанног, и чут-чутік пуктӧм вылӧ. Вӧзйис кывзыны сійӧс, гӧлӧсӧн кӧсйис отсавны, кытчӧ да кутшӧм пас пуктыны. Текстыс пӧ югыд, мича, муса.
 

Сёрӧнджык тыдовтчис, мый гижӧмторсӧ бергӧдісны эз ставныс. Журитысьяс ас костаныс юкисны уджъяссӧ да босьтчисны донъявны. 

Артмис со татшӧм серпас: 14 морт гижӧма "5" вылӧ, 22 морт - "4" вылӧ. Сӧмын кыклы эг пуктӧй некутшӧм дон. Коді да кыдзи гижис, позяс тӧдмавны аски Коми республикаса национальнӧй небӧгаин сайтысь.

Комментариев нет:

Отправить комментарий