пятница, 24 марта 2017 г.

Кӧрткерӧсын кӧсйысисны велӧдны коми кыв

Ӧнія кад кежлӧ Коми му юрсиктъяслӧн школаса медводдза классъясын коми кыдзи чужан кыв некӧн оз велӧдны (Косланын кындзи). "Коми войтыр" ӧтмунӧм пуктіс ас водзас мог - тӧдмавны ставсӧ места вылас да ыззьӧдны йӧзсӧ. Кык тӧлысь сайын ветлім Кулӧмдін сиктӧ. Тӧрыт квайтӧн воӧдчим Кӧрткерӧсӧдз.


 Медводз паныдасьлім Коми культура шӧринын "Коми войтыр" ӧтмунӧмлӧн Кӧрткерӧс представительствоын зільяскӧд. "Исерга" сьылысь котыр сьыліс миянлы "Исерга" да "Лӧнь Эжва дорын" сьыланъяс.
 
Сэсся пӧшти час сёрнитім коми кыв велӧдӧм йылысь. Представительствоын веськӧдлысьӧс вежысь Светлана Ивашева уджалӧ библиотекаын, ӧттшӧтш велӧдӧ коми (кыдзи абу чужан кыв) школаын 8-9 классъяслы. Велӧдам пӧ накӧд зэв кокниторъяс. Челядь оз кӧсйыны велӧдны, сы вӧсна мый тайӧ предметсьыс оз ковмы сдайтны ЕГЭ. Коми челядьлы (татшӧмыс эм жӧ Кӧрткерӧсад) абу интереснӧ тайӧ кокни тшупӧдас велӧдны коми кывсӧ, некутшӧма пӧ оз сӧвмӧд найӧс. Колӧ пӧ коми классъяс.

Нёбдінысь "Коми войтырын" водзмӧстчысь Елизавета Макарова шуис, мый Шойнаты школаса библиотекаын коми небӧгъяс куйлӧны медся пыдіинас, выставкаяс дасьтӧма ставнас рочӧн, оз во коми газет-журналъяс. Лӧсьыд нин пӧ, мый дугдісны судзӧдны "СПИД-инфо" газет.

Кӧрткерӧс представительствоӧн веськӧдлысь Любовь Кирушева тӧдчӧдіс кыдзи воясӧн вежсис "Коми войтырлӧн" районас уджыс. Кутім пӧ комиӧн
нуӧдны коми войтырлысь конференцияяс, йӧзӧдны "Звезда" районса газетын коми гижӧдъяс, а ачыс газетыс та кадас ёна рочмис.
 

Йӧзӧс велӧдан министерствоын уджалысь Сергей Габов шуис, мый локтӧ уна норасьӧм сы серти, мыйла пӧ колӧ велӧдны коми кыв, но абу ньӧти норасьӧм сы вылӧ, мыйла коми челядьӧс оз вермыны велӧдны чужан кыв вылын.

Сёйыштӧм бӧрын веськӧдчим шӧр школаӧ гӧгрӧс пызан сайӧ. Вочаалісны 5-ӧд да 7-ӧд номера челядь видзанінысь ныв-зон. Лыддисны коми кывбуръяс, сьылісны, йӧктісны да нӧшта на и козьналісны ас вӧчӧм дӧрапасъяс (плаг).


 Гӧгрӧспызанасим велӧдысьяслӧн жырйын кузьмӧс пызан сайын. Тӧдмасим ӧта-мӧдкӧд, казялім, мый абуӧсь школаса директорыс да сылӧн вежысьыс. Локтӧмны Адзорӧмысь, Пезмӧгысь, Калятыысь, Визябӧжысь велӧдысьяс. 

"Коми войтыр" ӧтмунӧмӧн веськӧдлысь Алексей Габов пасйис, мый Кӧрткерӧс районын вит вонас 23 % вылӧ чинӧма челядь лыдыс, кодъяс велӧдӧны комисӧ кыдзи чужан кыв (вӧлӧма 697 морт, лоӧма 567). 

Пезмӧг сиктса садикас челядьыс пӧ дзик рочӧсь нин. Адзорӧмысь нывбаба шензьӧдіс сійӧн, мый коми кывйысь гортса уджсӧ пӧ челядьыс вӧчӧны бать-мамыскӧд. Та вылӧ вочавидзис Сергей Габов: оз пӧ ков татшӧмторсӧ ошкыны; гортса уджсӧ колӧ сетны сідзи, медым кагаыс ачыс вермис отсасьтӧг вӧчны сійӧс. Тані пӧ тыдовтчӧ бать-мамыслӧн полӧмыс, мый кагаыслӧн мыйкӧ оз артмы.


Кӧрткерӧсса садикъясын уджалысьяс пасйисны, мый дзолюкъяслӧн да налӧн бать-мамыслӧн коми кыв дорӧ бур отношениеыс. Эм пӧ и дзик коми челядь.

Гӧгрӧс пызан дырйи вӧлі сёрнитчӧма, мый таво Кӧрткерӧс садикса челядьлысь бать-мамсӧ кутасны юасьны, коді кӧсйӧ велӧдны школаас комисӧ, кыдзи чужан кыв, да та подув вылын лӧсьӧдӧма класс либӧ джын класс. Зоя Остапова вӧзйис тайӧ челядьыскӧд водзвыв тӧдмасьны велӧдысьыслы, лӧсьӧдны накӧд йитӧд.


Зэв нимкодь, мый велӧдан управленньӧӧн веськӧдлысь Наталья Ярцева и кывзіс, и гижаліс аслыс. Район пасьта пӧ коми кыдзи чужан кыв велӧдӧны сӧмын 7 школаын. Кӧрткерӧс школаын пӧ велӧдчӧны орчча сикт-грездысь коми челядь (Позтыкерӧс, Додз, Визябӧж). 

Юӧртіс и бать-мамлӧн шыӧдчӧмъяс йылысь: коми кыв велӧдӧмкӧд йитӧдын пӧ содӧ велӧдчысьясыслӧн нагрузкаыс; коми кыв пӧ торкӧ аттестатсӧ налысь, коді велӧдӧ комисӧ кыдзи чужан кыв (мукӧдыслы виттӧ пӧ пукталӧны тшӧкыдджыка).


Та вылӧ коми кывйысь велӧдан небӧгъяс дасьтысь Валентина Грабежова шуис, мый коми челядь велӧдӧны 1 час вылӧ унджык, и тайӧ пӧ некыдзи оз вермы ёна содтыны нагрузкасӧ. Таво жӧ пӧ содіс коми кывйысь экзамен сдайтны кӧсйысьяслӧн лыдыс (50-сянь 79-ӧдз).


Сёрниыс вӧлі коланаӧн да муніс лӧня.

Комментариев нет:

Отправить комментарий