четверг, 18 мая 2017 г.

Визинын коми кыв серти гӧгрӧс пызан



Сыктыв районса Визин сиктын гӧгрӧс пызаннёльӧд нин, кытчӧ мӧдӧдчис «Коми войтыр» ӧтмунӧм. Чукӧртчыліс морт комын.



Медводз Сыктыв районса администрацияӧн веськӧдлысьӧн вежысь Марина Николова тӧдмӧдіс, кыдзи коми кыв велӧдӧм пуктӧма налӧн районас. Дас ӧти школаысь квайтын коми велӧдӧны кыдзи чужан кыв, но вочасӧн чинӧ челядьлӧн лыд, кодъяс велӧдӧны мам кывнысӧ пыдісянь (таво кежлӧ татшӧмыс вӧлӧма 11,6 %). Сэк жӧ, куим пӧв содӧма (8-сянь 24-ӧдз) коми кывйысь экзамен сдайтны кӧсйысьыс. Сылӧн кывъяс серти, велӧдны коми кыдзи канму кыв абу кокниджык, но мыйлакӧ бать-мамыс бӧрйӧны буретш тайӧ уджтассӧ. Окота пӧ вежны коми кыв велӧдӧм бурланьӧ, а ышӧдӧм могысь колӧ мӧвпыштны сы йылысь, медым коми кывйысь экзамен сдайтысьяслы вӧлі кокньӧд университетӧ пыригӧн. 



Гӧгрӧс пызан дырйи вӧлі кыпӧдӧма сёрни и культура юкӧнын коми кывйӧн вӧдитчӧм йылысь. Марина Будимировна вайӧдіс со татшӧм мытшӧдъяс: культураын зільысьяс мероприятиеяссӧ дугдӧмаӧсь нуӧдны комиӧн, гежӧда либӧ пӧшти абуӧсь коми сьыланкывъяс да йӧктӧмъяс. А кӧні пӧ коми йӧктӧмъяс?!



«Коми войтыр» ӧтмунӧмӧн веськӧдлысь Алексей Габов юксис шогӧдан статистикаӧн: Сыктыв районын 2012 воын кӧ коми кыдз чужан кыв велӧдӧма 220 морт, 2016 воын – 163-ӧн нин. Вайӧдіс пример пыдди, мый Коми муӧ локтысьяслӧн став челядьыс сёрнитӧны мам кывнас, кӧть и налысь кывсӧ миян школаясын оз велӧдны и канмусянь некутшӧм кокньӧд оз виччысьны.


«Гӧгрӧс пызан» сайын пукалысьяс шуисны, мый коми кывйысь кык уджтас лӧсьӧдӧм бӧрын ми пӧ быттьӧ бӧрйысям, кутшӧм мам бӧрйыны; миянӧс пӧ оз ков агитируйтны, а колӧ пӧ удж нуӧдны сиктъясын бать-мамыскӧд, кодъяс мӧвпышттӧг эновтчӧны коми кывйысь. Та вылӧ Людмила Камбалова да ме висьталім ассьыным челядьнымӧс карын быдтӧм йылысь, гӧгӧрвоӧдім, мый Сыктывкарын позьӧ быдтыны комиӧн сёрнитысь челядьӧс, сӧмын колӧ кӧсйӧм да зільӧм. Визинсаяслы вӧзйим котыртны коми семьяяслысь клуб, кӧні челядьыскӧд кутасны ставныс сёрнитны комиӧн.


Сёрни кыптыліс и коми кывйысь велӧдан небӧгъяс да университетын велӧдысьясӧс дасьтӧм йылысь. Матысса кадас Сыктыв районса велӧдан управленньӧ лӧсьӧдас уджалан котыр да босьтчас тӧдмавны, кыдзи позьӧ ёнмӧдны коми кыв велӧдӧмсӧ, медым Сыктыв му чужтіс эз ӧти на Куратовӧс.

Комментариев нет:

Отправить комментарий