воскресенье, 26 ноября 2017 г.

Сыктывкар локтан во кежлӧ дась

Дзик на неважӧн Сыктывкарын юргис кывбур висьталысьяслӧн республикаса конкурс, мый вӧлі сиӧма Коми республикаса куим нимйӧза гижысьлы - Геннадий Юшковлы, Владимир Тиминлы да Василий Лодыгинлы. И сэки жӧ вӧлі вӧзйӧма, медым локтан вося конкурссӧ вӧлі сиӧма кык юбилярлы - Нёбдінса Витторлы, кодлы 2018 воын тырӧ 130 во, да Коми республикаса нимйӧза гижысь Альберт Ванеевлы, кодлы тырӧ 85 во чужӧмсяньыс.


Локтан во кежлӧ дасьтысьӧмӧн юркарын нуӧдісны кывбур лыддьысьяслысь карса конкурс, кытчӧ пырӧдчисны 3-8 класса велӧдчысьяс. Вӧльгым тӧлысь 23 лунӧ ныв-зон чукӧртчывлісны нывъяслӧн карса гимназияын. 
Ичӧт жырйыд ӧдйӧ тырис йӧзӧн. Мукӧд челядьыс бура сёрнитісны ас костаныс комиӧн. Тӧдчӧ, мый чужлӧмаӧсь да быдмӧмаӧсь сиктын, а сэсся сёрӧнджык нин вуджӧмаӧсь семьяыскӧд карӧ.
Ышӧдігмоз ӧтвыв сьылім Виктор Савинлысь "Чужи-быдми сьӧд вӧр шӧрын" гудӧк улӧ.

Донъявны ме веськалі коймӧд классӧ, кӧні куимӧн кывзім дас сизим мортӧс. Медводдзаӧн лоис Софья Уляшева (21 №-а школа), мӧд местаыс кыклӧн - Алина Паршуковалӧн (38 №-а школа) да Татьяна Доскачёвалӧн (18 №-а школа), коймӧдыс тшӧтш кыклӧн - Карина Гонтаруклӧн (28 №-а школа) да Анна Мухачёвалӧн (30 №-а школа).

Донъявны да вермысьяссӧ бӧрйыны ковмис дырджык кывбур висьталысьяссӧ кывзӧм дорысь. Донъялігкостті челядьыс чукӧртчӧмаӧсь нин вӧлі ыджыд жыръяс.

Вермысьясыс локтан во петкӧдчасны республикаса конкурсын нин.

Комментариев нет:

Отправить комментарий