Лыддьӧ мам

Донъяла "Лыддьысьӧ мам - лыддьысьӧ и канму" конкурсӧ мӧдӧдӧм уджъяс. Быдсямасӧ ыстӧмаӧсь, но медшӧр ШОГЫС сыын, мый ог аддзы, мый кагаыс окотапырысь кӧсйӧ лыддьыны, висьтавны, ог аддзы, мый ныв-зонъясыс бура кывзӧны мамсӧ, ог аддзы челядьыслысь тӧдны кӧсйӧмсӧ. Мырдӧн-сорӧн ставыс. Видеосӧ мукӧдыс снимайтӧмаӧсь, буракӧ, сӧмын сы могысь, медым пырӧдчыны конкурсӧ да шедӧдны кӧть кутшӧмкӧ сертификат. 

Фотоыс ӧтуввезйысь

Шуйгун спектакль

Лолӧн шойччи "ШУЙГУН" спектакль видзӧдігӧн. Премьераыс зэв аслыспӧлӧс, пыртӧма выльсикас приёмъяс. Тыдалӧ том ворсысьяслӧн ӧзъяна вирыс, асьсӧ петкӧдлісны и нимӧдана да нимйӧза нин коми артистъяслы.

Снимокыс со татысь: https://vk.com/studioepaneshnikov

Коми национальнӧй гимназияын восьса ӧдзӧс лун

Коми национальнӧй гимназияын талун восьса ӧдзӧс лун вӧлі. Директор Е.Н. Ярошенколӧн  корӧм серти ветлім "Коми войтыр" ӧтмунӧмлӧн Сыктывкарса представительствосянь мастер-классъяс нуӧдны. Тайӧ гимназияас уна во нин велӧдӧны коми кыв (кыдзи чужан и каналан кывъяс уджтасъяс серти).

Кыв поз. Кӧкъямысӧд чукӧртчӧм

Со и нуӧдім "Кыв поз" проектлысь кӧкъямысӧд и бӧръя практикум. Нимкодь, мый пыр выль семьяяс локтӧны, сідзкӧ эм асланыс кӧсйӧм вежсьыны да вежны ас гӧгӧртассӧ.
  

Сыктывкарса коми войтырлӧн конференция

Пекничаӧ, вӧльгым тӧлысь 23-ӧд лунӧ, 14 чассянь сыктывкарса администрацияын лоӧ сыктывкарса коми войтырлӧн конференция.
Темаыс - "Кывным миян асьнымӧс на видзӧ" - Коми Республикаса нимйӧза кывбуралысь Владимир Васильевич Тиминлӧн кывбурысь. 

Эстмуын некымын лун

Уна во мысти воӧдчи жӧ Эстмуӧдз. Таӧдзыс эг веськав туялысьяслӧн кык конференция вылӧ 2000-ӧд вояс пансигӧн. Та пӧрйӧ мӧдӧдчи суйӧр сайӧ фин-йӧгра войтырлӧн конференция вылӧ, кодӧс нуӧдӧны Фин-йӧгра войтырлӧн ставмирса конгрессъяс костын, медым сёрнитны конгресслӧн Помшуӧмъяссӧ олӧмӧ пӧртӧм йылысь. Коми войтырсянь гожӧмнас вӧлі бӧрйӧма вит делегат. Нӧшта ӧти мортӧс экспертӧн корлісны.

Кыв поз. Сизимӧд чукӧртчӧм

Зэв ӧдйӧ лэбыштіс кадыс квайтӧд паныдасьлӧмсяньыс, кор чукӧртчывлім гожся шойччӧм бӧрын сёрнитны комиӧн артасьӧм да лыд шуалӧм йылысь. Сизимӧдысь чукӧртчывлім нӧшта на ӧти мытшӧд йылысь тӧдмасьны.

Кыв поз. Квайтӧд чукӧртчӧм

Гожся шойччӧм бӧрын выль вынъясӧн босьтчим нуӧдны "КЫВ ПОЗ" проектлысь семинар-практикумъяс.

И тадзи на овлӧ

Аскомысь Сыктывкарын бӧрйӧны каналан сӧветса депутатӧс 2-ӧд академическӧй бӧрйысян кытш серти. 

Куим во сайын ме бӧрйыси жӧ тайӧ кытшас. И ӧні виччыси, кор жӧ юӧртасны, кӧні кута бӧрйысьны. 

Выльтыдорлӧн чужан лун

Выльтыдор посёлоклӧн талун чужан лун. Ветлі видзӧдны концерт, чолӧмавны олысьяссӧ да аттьӧавны субӧтник вылӧ петысь челядьӧс.

Поводдяыс отсаліс гажсӧ вӧчны кыпыдӧн: помасисны зэръяс, мыччысис шонді. Чужан лун кежлӧ удитӧмаӧсь выльмӧдны культура керкалысь кильчӧсӧ.

Чужан лунсӧ эськӧ пасйылӧны лӧддза-номъя тӧлысь 19-ӧд лунӧ. Буретш тайӧ лунас 1981 воын посёлоклы сетӧмаӧсь Выльтыдор ним. А сыӧдзыс медводдзаысь казьтыштӧмаӧсь 1956 вося переписьын Выль Затон ним улын.

Культура керка пытшкас стенмас ӧшалӧны Айму вӧсна ыджыд тыш вылӧ ветлысьяслӧн да тылын уджалысьяслӧн фотоясыс. Тані зэв уна коми ов…. 2010 вося йӧзӧс арталігӧн Выльтыдорын комиыс олӧма 54 прочент (ставнас 600 гӧгӧр морт).

Посёлоклы чужан лунлы сиӧм кончерт дасьтӧма вӧлі сьӧлӧмсянь да муніс кокниа. Сьылӧм-йӧктӧмъяс видзӧдігмоз тӧдмалі, мый садикысь школаӧ медводдза классӧ таво мунӧны 5 дзолюк, медся пӧрысьыслы 89 арӧс (ачыс пӧ весиг кӧсйӧма волыны), посёлоккӧд ӧттшӧтш чужан лун пасйӧ 80 арӧса ань, эм выльтыдорсаяслӧн футбол да хоккей командаяс (таво шедӧдӧма "Павел Францлысь кубок"), лавкаын вузасьысьяс ёна отсасьӧны гажъяс нуӧдігӧн.

Ёна кекеначасисны челядь сьылӧм-йӧктӧмлы, "Сыктыв му" хорлы да балалайкаӧн ворсысьяслы. Оз вун, кыдзи видзӧдысь челядь ӧттшӧтш ахнитісны, кор сцена вылӧ петіс контрабас.

Ассянь чолӧмалі субӧтник вылӧ петысь вит ныв-зонмӧс, козьналі налы "Коми войтыр" ӧтмунӧмсянь "Арт" журналлысь выль петас (сиӧма ставныс Сыктывкарлы) да юмовторъяс.

Культура керкаӧн веськӧдлысь Ольга Жакова да худрук Надежда Гайдэу (сійӧ жӧ и старостаыс) котыртӧмаӧсь сьӧлӧм вӧрзьӧдӧна гаж, а видзӧдысьяслӧн реакция серти позьӧ вӧлі гӧгӧрвоны, мый ставыс артмис лючки-бура.

Коми кыв велӧдысьяслӧн лыд йылысь бӧръя юӧръяс

"Коми войтыр" ӧтмунӧмлӧн Исполком заседанньӧ дырйи юргисны со татшӧм лыдпасъяс:

* 2018 вося кӧч (сентябр) тӧлысь 1 лунсянь Коми республикаса школаясын коми кыдзи ЧУЖАН кыв кутасны велӧдны 3707 морт (став велӧдчысьсьыс 4,8 %).

Выльтыдорын субӧтникасим

"Коми войтыр" ӧтмунӧмлӧн Сыктывкар представительство субӧтникасис. Тайӧ пырис нин традицияӧ. Кыдзи и колян во, таво ёг бара чукӧртім Выльтыдор посёлокын.

Кыв поз. Нёльӧд чукӧртчӧм

"Кыв поз" проектлӧн нёльӧд чукӧртчӧм муніс тӧдлытӧг да ӧдйӧ. Мунтӧдз ӧтувъя снимок.

Коми ворсӧмъяс йылысь выль фильм

Зэв нимкодь вӧлі тӧдмавны, мый коми режиссёр Галина Маркова кӧсйӧ дасьтыны коми йӧзкостса ворсӧмъяс йылысь фильм. Кор шыӧдчис ме дорӧ, окотапырысь висьталі ассьым вӧзйӧмъясӧс, козьналі коми ворсӧмъяс йылысь "Чинки, Киколь да Геч" небӧгӧс (петавліс 2011 воын). И со, тӧрыт видзӧдім дась фильмсӧ Сыктывкарса коми культура шӧринын.

Кыв поз. Коймӧд чукӧртчӧм

Коми бать-мамъяс "Кыв поз" проектлӧн коймӧд практикум дырйи водзӧ юксисны асланыс мӧвпъясӧн сы йылысь, кыдзи позьӧ вуджӧдны да сӧвмӧдны коми кыв семьяын. Зэв нимкодь, мый бать-мам эз сӧмын кывзыны, а асьныс нин эксперталісны тайӧ нырвизяс.

Юалӧмысь - сьӧм

Кыдзи и кольӧм во, 2018 воын "Коми войтыр" ӧтмунӧмса Сыктывкар представительство да Сыктывкарса коми культура шӧрин котыртӧны "Кӧні? Мый? Кор" конкурс. Ворсӧмӧ пырӧдчасны юркарса коми землячествояс да карса уджаланінъясысь котыръяс.

Кыв поз. Мӧд чукӧртчӧм

"Кыв поз" проект серти мӧд чукӧртчӧм вӧлі нуӧдӧма урасьӧм тӧлысьӧ. Коми семьяяс дорӧ Ёртасян керкаӧ локтісны выль бать-мам да челядь.

Кыв поз. 1 чукӧртчӧм

"КЫВ ПОЗ" проект серти нуӧдім медводдза чукӧртчӧм. Ставнас татшӧм паныдасьлӧмыс лоас 2018 во чӧжнас кӧкъямысысь. Панім уджтассӧ коми бать-мамлы да налӧн челядьлы, медым нӧшта ӧтчыдысь тӧдчӧдны семьяын коми кыв видзӧмлысь коланлунсӧ.