Кыв поз. 1 чукӧртчӧм

"КЫВ ПОЗ" проект серти нуӧдім медводдза чукӧртчӧм. Ставнас татшӧм паныдасьлӧмыс лоас 2018 во чӧжнас кӧкъямысысь. Панім уджтассӧ коми бать-мамлы да налӧн челядьлы, медым нӧшта ӧтчыдысь тӧдчӧдны семьяын коми кыв видзӧмлысь коланлунсӧ.

Кыдзи и мӧвпыштім, медводдзаысьсӧ чукӧртчим Коми республикаса вужвойтырлӧн Ёртасян керкаын. Дзолюкъяскӧд вӧчасьны корим 47-ӧд №-а челядь видзанінысь кагульничаясӧс - Мария Игушеваӧс да Марина Лопыреваӧс. Отсасьны чукӧстім И.А. Куратов нима педколледжысь велӧдчысьясӧс - Василина Зайкова да Алина Лодыгина.

Медводз ныв-зон да кагульничаяс тӧдмасисны: ас йывсьыс дженьыда висьталісны, дерт жӧ, комиӧн. А сэсся налӧн пансис кыпыд удж "Тӧв" тема серти - вӧчалісны Лыммортӧс да лымчир-чача.

А сэк костті налӧн бать-мамыс сёрнитісны кыккывъялун йылысь. Педагогика наукаясса кандидат Зоя Васильевна Остапова тӧдмӧдіс коми кыв видзан уджӧн да кыккывъялунӧн. Сылӧн кывъяс серти, коми бать-мам быдтӧны уникальнӧй коми кывъя челядьӧс, кодъяс лоӧны зэв коланаӧсь.

Вель дыр пӧ вӧлі чайтӧны, мый челядьӧс кык кывйӧ ӧттшӧтш велӧдӧм оз лэдз тыр-бура велӧдны кыкнан кывсӧ. Но туялысьяс эскӧдӧны, мый тайӧ сӧрӧм. 

Мирас унджыкыс билингвъяс. И медым бура тӧдны кывъяс, колӧ сёрнитны ичӧт дырсянь. Медбура кывъясӧ велалӧны 7-8 арӧсӧдз, а сэсся кыв велӧдан сямыс чинӧ.

Кык и унджык кыв тӧдысьяс торъялӧны ӧти кывъя войтырысь: найӧ внимательнӧйджыкӧсь, паметяӧсь, и с.в. Кыккывъялуна войтыр озджык висьны гежӧд висьӧмъясӧн, сёрӧнджык налы кӧвъясьӧны выжыласьӧм и с.в.

Видзӧдім бать-мамкӧд видеояс, кӧні сёрнитӧны кыккывъялун йылысь специалистъяс. На пиысь ӧтиыс - Хельсинкиысь педагогика наукаясса доктор Е.Ю. Протасова. Екатерина Юрьевна шуӧ, мый кыккывъялунын абу некутшӧм лёктор. Мӧдарӧ, сійӧ ёнджыка сӧвмӧдӧ мортӧс (абстрактнӧй мӧвпалӧм, когнитивнӧй сямъяс). И казьтыштіс, мый уна нималана гижысь вӧлі тӧдӧны кык кыв ичӧтсяньыс, да пример пыдди вайӧдіс Александр Пушкинӧс. 

Кор помасис бать-мамлы лекция да челядьлы занятие, ми ӧтвылысь чукӧртчим кытшӧ тӧдмасьны ӧта-мӧдкӧд.

А сэсся шылада велӧдысь Марина Лопырева юрнуӧдӧм улын ми ӧтвылысь велӧдім да сьылім "Лым" сьыланкыв.

Локтан паныдасьӧмыс лоас урасьӧм тӧлысь 18-ӧд лунӧ 11 чассянь Ёртасян керкаын. Унджык юӧр лыддьӧй проектлы сиӧм "КЫВ ПОЗ" котырысь Контактын.

 

"Кыв поз" проект олӧмӧ пӧртӧ "Коми войтыр" ӧтмунӧм Коми республикаса национальнӧй политика министерство отсӧгӧн да "Лукойл" сьӧм вылӧ.