суббота, 24 февраля 2018 г.

Кыв поз. Мӧд чукӧртчӧм

"Кыв поз" проект серти мӧд чукӧртчӧм вӧлі нуӧдӧма урасьӧм тӧлысьӧ. Коми семьяяс дорӧ Ёртасян керкаӧ локтісны выль бать-мам да челядь.




Айму вӧсна дорйысьяслӧн лун водзын челядь пӧртчисны морякъясӧ да мӧдӧдчисны кагульничаяслӧн веськӧдлӧм улын ыліса путешествиеӧ. Пилоткаяс да воротникъяс пасьталӧм бӧрын ныв-зон азыма босьтчисны вӧчасьны.



Мария Игушева вӧзйӧм серти ныв-зон дасьтісны батьясыслы саридз темаа лунпас (календар).



Йӧввыв гижкӧд йитӧдын Марина Лопыревакӧд найӧ велӧдісны "Козйӧ, козйӧ" коми йӧзкостса сьыланкыв. Челядь тӧдмасисны важся йӧзкостса инструментъясӧн да видлісны наӧн ворсны.

Кагульничаяслы отсасисны педколледжысь студентъяс Василина Зайкова да Алина Лодыгина.

Бать-мам жӧ та кадӧ ӧтув мӧвпалісны, кыдзи кыккывъя семьяын видзны чужан кыв. Медводз найӧ кывзісны психолог Мария Грищенкоӧс, коді лӧсьӧдӧма тайӧ тема сертиыс сёрни.


Шензьӧдіс эскӧдӧмъяс, мый эмӧсь семьяяс, кӧні роч верӧсыс оз кӧсйы, медым гӧтырыс сёрнитіс кагаыскӧд комиӧн, сы вӧсна мый оз гӧгӧрво, мыйла колӧ тайӧ кывйыс, кор ставныс гӧгӧрвоӧны рочӧн? Быдӧн корсьӧ практическӧй коланлун. Татшӧм семьяясын, дерт, коми кыв видзны позянлун абу, кагаыд ӧдйӧ рочмӧ.

Психологъяслӧн висьталӧм серти, 3-4 да 6-10 арӧсъясыс пӧ челядьлӧн сэтшӧм кадколаст, кор найӧ пондӧны яндысьны. Буретш та кадӧ челядь дугдӧны комиӧн варовитны.


Унаӧс пӧрйӧдлӧ, кор комиӧн сёрнитысь кага мунӧ садикӧ да заводитӧ рочасьны. Бать-мам чайтӧны, мый сэсся абу некутшӧм позянлун венласьны роч кывкӧд, да сетчӧны тайӧ рочмӧдан руыслы. А вӧлӧмкӧ, нёль арӧсӧдз кыв сорлалӧм - тайӧ челядьлы норма, мыйысь повны оз ковны. Бать-мамлы кольӧ сӧмын грамотнӧя кагакӧд сёрни тэчны.


Психолог сетіс сӧветъяс, кыдзи бергӧдны бӧр челядьсӧ коми кывлань: корны сійӧс сёрнитны бать-мамыскӧд комиӧн; ветлывлыны комиӧн сёрнитысь пӧль-пӧч дорӧ; ошкыны коми кывйӧн вӧдитчӧмсӧ; и с.в.


Бать-мамлӧн вӧлі кад юксьыны ас мӧвпъясӧн да сетны сӧветъяс мукӧд бать-мамыслы, кодъяс майшасьӧны на коми кыв вӧдитчӧмын.



Локтан паныдасьӧмыс лоас рака тӧлысь 18-ӧд лунӧ 11 чассянь Ёртасян керкаын. Унджык юӧр лыддьӧй проектлы сиӧм "КЫВ ПОЗ" котырысь Контактын.

"Кыв поз" проект олӧмӧ пӧртӧ "Коми войтыр" ӧтмунӧм Коми республикаса национальнӧй политика министерство отсӧгӧн да "Лукойл" сьӧм вылӧ.

Комментариев нет:

Отправить комментарий