Кыв поз. Коймӧд чукӧртчӧм

Коми бать-мамъяс "Кыв поз" проектлӧн коймӧд практикум дырйи водзӧ юксисны асланыс мӧвпъясӧн сы йылысь, кыдзи позьӧ вуджӧдны да сӧвмӧдны коми кыв семьяын. Зэв нимкодь, мый бать-мам эз сӧмын кывзыны, а асьныс нин эксперталісны тайӧ нырвизяс.

Мӧд чукӧртчылігӧн быдӧн гижліс ас семьяысь либӧ лӧсьӧдӧм мытшӧдъяс, медым ӧтув вермим сетны сӧветъяс. Коймӧдысьсӧ паныдасигӧн тасянь и панім сёрнинымӧс.

Со, шуам, ӧти морт тӧждысьӧ сы йылысь, оз-ӧ кутны классас ӧтдортны ӧтка коми велӧдчысьӧс? Мый колӧ вӧчны бать-мамлы да велӧдысьлы, медым кагаыс эз кыв асьсӧ увтыртӧмӧн?

Бать-мам вӧзйисны психологическӧя лӧсьӧдны кагасӧ та кежлӧ, а велӧдысьыслы ошкыны кык кывъя челядьӧс мукӧд водзас. Кагалы пӧ колӧ классыскӧд ӧтувчыны, а сідзжӧ гӧгӧрвоны, мый сійӧ мукӧдысь ёна торъялӧ, нӧшта ӧти кыв тӧдӧ да. Школаын коми кыв велӧдӧм пӧ вермас тшӧтш кыпӧдны коми кыв тӧдысь велӧдчысьлысь авторитетсӧ. Вӧзйисны и аддзыны классас либӧ школаас аскоддьӧмсӧ, кодкӧд позьӧ сёрнитны комиӧн.

Мӧд мытшӧд – сёрнитігӧн пӧ кага бӧрйӧ роч кыв, а оз коми. Мый колӧ вӧчны, медым рочмӧм кагасӧ бӧр бергӧдны комилань? Психологъяс висьталӧм серти, быдмыштӧм челядь эновтчӧны кык кывйӧн зіля вӧдитчӧмысь да вуджӧны вевтыртысь кыв вылӧ.

Дерт жӧ, тайӧ мытшӧд сертиыс медводдза вӧзйӧмыс вӧлі инмӧ бать-мамыслы – колӧ тшӧкыдджыка и быдлаын кагаыдкӧд сёрнитны комиӧн. Весиг кагаыд кӧ кутас вочавидзны либӧ юасьны рочӧн, налы колӧ шуны комиӧн.

Тшӧкыдджыка чужан кыв кутас юргыны и сэки, кор коми семьяяс кутасны волысьны, ёртасьны, котыртавны ӧтувъя гажъяс, кӧні вермасны аскоддьӧмыскӧд варовитны. Шуам, Сыктывкарын коми семьяяслӧн «Шуда котыр» 2015 воын та могысь и вӧлі котыртӧма.

Психологъяс жӧ вӧзйӧны быд ногыс ошкыны кагатӧ коми кывйӧн сёрнитӧмысь (а уна-ӧ ми асьным тӧдам ошкан кыв комиӧн?) да бать-мамлы лӧсьӧдны кагаыдкӧд ёртасян да бур йитӧд.

Налы, кодъяслӧн челядьыс рочӧн сёрнитӧны, бать-мамлӧн эм жӧ вӧзйӧмъяс. Медводз колӧ каганытӧ мотивируйтны, медым налӧн чужис коми кыв велӧдны кӧсйӧм. Шуам, вӧчны коми кыв – «шпион кывйӧн», и сёрнитны сійӧн, медым эз вермыны гӧгӧрвоны мукӧдыс – батьыс, пӧль-пӧчныс и с.в. А кыв велӧдӧм могысь ковмас лӧсьӧдны колана условиеяс – ветлыны коми гажъяс вылӧ, музейӧ да театрӧ, кывзыны комиӧн радио да телеуджтасъяс, и с.в.

Бать-мамлы жӧ психолог Мария Глущенко вӧзйис практикум дырйи мӧвпыштны да гижны сы йылысь, мый найӧ кӧсйӧны челядьсяньыс да мый найӧ асьным вӧчисны нин тайӧ нырвизяс. Артмис сідзи, мый унаӧн кӧсйӧны, медым челядьныс тӧдісны коми кыв, асьнысӧ кылісны коми мортӧн, тӧдісны ордпусӧ, пыдди пуктісны чужан кывсӧ.

Практикум дырйи чужис и нӧшта ӧти вӧзйӧм – каникулъяс дырйи котыртны коми велӧдчысьяслы велӧдчан лагер комиӧн.

Верстьӧяслӧн сёрнитіг костті челядь тӧдмасисны коми серъясӧн, ворсісны коми серъяс подулын лӧсьӧдӧм ворсӧмъясӧн. А сэсся вӧчисны  киндер-сюрприз колькйысь да пластик паньясысь шуршар-чача.
 

Чукӧртчылӧмным помасис помӧсдінса шен йӧктӧмӧн. Бать-мамныскӧд ӧтвылысь челядь тӧдмасисны некымын фигураӧн.
 

Мунӧм водзвылын ӧтувъя фото:

Медводдза да мӧд чукӧртчӧм йылысь лыддьӧй воддза гижӧдъясысь.

Нёльӧдысь чукӧртчылам косму тӧлысь 15-ӧд лунӧ 11 чассянь Ёртасян керкаын. Унджык юӧр лыддьӧй проектлы сиӧм "КЫВ ПОЗ" котырысь Контактын.

"Кыв поз" проект олӧмӧ пӧртӧ "Коми войтыр" ӧтмунӧм Коми республикаса национальнӧй политика министерство отсӧгӧн да "Лукойл" сьӧм вылӧ.