понедельник, 29 октября 2018 г.

Кыв поз. Сизимӧд чукӧртчӧм

Зэв ӧдйӧ лэбыштіс кадыс квайтӧд паныдасьлӧмсяньыс, кор чукӧртчывлім гожся шойччӧм бӧрын сёрнитны комиӧн артасьӧм да лыд шуалӧм йылысь. Сизимӧдысь чукӧртчывлім нӧшта на ӧти мытшӧд йылысь тӧдмасьны.


Верстьӧяс медводз "ворсісны" (абу ӧд сӧмын челядьлы ворсны): воча сувтӧмӧн чолӧмасисны быдсяманогыс да висьталісны вомъёртыслы буртор. Ас костын йитӧд лӧсьӧдӧм бӧрын вочавидзим анкеталӧн юалӧмъяс вылӧ. А сэні дас сайӧ юалӧм, на лыдын татшӧм: кутшӧм мойдъяс лыддянныд челядьыдлы? Мойдсӧ ёнджыкасӧ лыддянныд либӧ висьталанныд, пуктанныд? Ворсанныд-ӧ кагаыдкӧд да мыйысь? 


 Вочасӧн вуджим шӧр сёрнилань - коми кагалысь сёрни да мӧвпалӧм сӧвмӧдӧм. Миянӧс велӧдысьяс - Анастасия Третьякова да Мария Грищенко - висьталісны кагалӧн сёрни-мӧвпалӧм сӧвман нёль тшупӧд йылысь, индісны быд тшупӧдлысь аслыспӧлӧслунсӧ.

Буретш арлыд да сям тӧд вылын кутӧмӧн и вӧзйӧны психологъяс сӧвмӧдны челядьӧс. А тані велӧданногыс да приёмыс уна. Медшӧрыс миян олӧмын - сёрнитны кагакӧд чужан кывйӧн ворсіг моз да тшӧктытӧг.

Радейтӧны челядь шыяс петкӧдлан кывъяс. Та могысь колӧ накӧд велӧдны звукоподражательнӧй кывъяса кывбуръяс, мыйӧн озыр коми челядь фольклор (лелькуйтчанкывъяс, прибауткаяс, лыддьысянкывъяс, и с.в.). Арлыд вылӧ видзӧдӧмон колӧ лыддьыны либӧ висьтавны мойдъяс. Бур лоӧ, мукӧдторсӧ кӧ театрализуйтам. 

2-4,5 арӧсаяслы позьӧ вӧзйыны ворсны со тадзи: ӧти шуалӧ пемӧсъясӧс. Кагаыслы колӧ кекӧначасьны, тайӧ кӧ гортса пемӧс, либӧ кокӧн зымгыны вӧрса пемӧс ним кывлӧн бӧрын.

Туйын ли гортын позьӧ кывъя ворсӧмъясысь ворсны: лӧсьӧдны ӧти ыджыд кывйысь некымын дженьыд; корсьны кывлы ӧткодь либӧ паныд вежӧртаса кывъяс; ворсны "Каръяс", "Бӧж - ныр" ("Кыв чеп") ворсӧмъясысь, и с.в. 


Челядьлӧн та пӧрйӧ вежсис вӧчасяніныс. Водзынсӧ кӧ вӧчасисны пызан вылын, та пӧрйӧ - джодждӧра вылын джоджын.



 Найӧ окотапырысь вӧчалісны бумагысь туриӧс.

 Удитісны сідзжӧ дасьтысьыштны выльвося гаж кежлӧ да велӧдісны коми сьыланкывъяс ("Лым", "Коз пу"). Да, регыд Выль во. И кыдзи век, сы водзын кутам нуӧдны челядьнымлы выльвося гаж. Кадсӧ индам да юӧртам на.


Помланьыс бать-мамыскӧд ӧтвылысь челядь тӧдмасисны коми йӧзкостса ворсӧмъясӧн. Пудъясьӧм бӧрын ворсісны "Синтӧм гораньысь", "Гизь-гизь, гораньӧйысь" да гезйӧн.

Воддза паныдасьлӧмъясыс: медводдза, мӧд, коймӧд, нёльӧд да квайтӧд.

Кӧкъямысӧд (и бӧръя) паныдасьӧмыс вӧльгым тӧлысь 18-ӧд лунӧ 11 чассянь Ёртасян керкаын. Унджык юӧр лыддьӧй проектлы сиӧм "КЫВ ПОЗ" котырысь Контактын.

"Кыв поз" проект олӧмӧ пӧртӧ "Коми войтыр" ӧтмунӧм Коми республикаса национальнӧй политика министерство отсӧгӧн да "Лукойл" сьӧм вылӧ.

Комментариев нет:

Отправить комментарий