четверг, 1 ноября 2018 г.

Эстмуын некымын лун

Уна во мысти воӧдчи жӧ Эстмуӧдз. Таӧдзыс эг веськав туялысьяслӧн кык конференция вылӧ 2000-ӧд вояс пансигӧн. Та пӧрйӧ мӧдӧдчи суйӧр сайӧ фин-йӧгра войтырлӧн конференция вылӧ, кодӧс нуӧдӧны Фин-йӧгра войтырлӧн ставмирса конгрессъяс костын, медым сёрнитны конгресслӧн Помшуӧмъяссӧ олӧмӧ пӧртӧм йылысь. Коми войтырсянь гожӧмнас вӧлі бӧрйӧма вит делегат. Нӧшта ӧти мортӧс экспертӧн корлісны.



Эстмуса Тарту карын чуймӧдіс кык во сайын восьтӧм фин-йӧгра войтырлы сиӧм музей. Висьталӧм серти, музей кыпӧдӧма сэні, кӧні водзынсӧ вӧлӧма сӧвет кадся военнӧй аэродром. Буретш СССР киссян кадӧ сэні самолёт дивизиянас веськӧдлӧма Джохар Дудаев, коді пӧ абу кывзӧма вылыс командованиеыслысь тшӧктӧмсӧ (и лоӧма пыдди пуктана мортӧн ичӧтик канмуын). Тайӧ кадколастсӧ тӧд вылын кутӧмӧн и музейсӧ вӧчӧма лэбысь самолёт моз:

Музейлӧн кузьтаыс 360 метр, сы увті визувтӧ шор - зэв аслыспӧлӧс да мича. 

Локтысьяслы медводз син улас усьӧ перымса войтырлы (коми, перымса коми да удмурт) сиӧм жыр. Кильчӧа керка, вӧралан да чери кыян эмбур. 


Керка пытшкӧсас шензьӧдӧ "ловъя" пызан - быттьӧ мойдысь пызан дӧра, ӧти корӧмӧн сетӧ став чӧсмасянторсӧ. Тырмӧмӧн бергӧдыштны пызан вылысь дозмук - и вежсьӧ вӧлӧгаыс. Позьӧ аддзыны сёян серпасъяс да лыддьыны рецептъяс. 



Музейын жӧ вӧлі панӧма фин-йӧгра войтыр асшӧрлунлы сиӧм конференция. Медводз висьтасисны Марий Эл, Мордовия, Удмуртия, Коми да Карелияысь корӧм йӧз. Юӧртісны, кыдзи 1917 во вежис фин-йӧгра войтырлысь олӧмсӧ да кыдзи шедӧдісны аслыныс торъя мутасъяс.
А сэсся Суоми, Эстму да Маддярмуысь воӧмаяс висьталісны, кыдзи шедӧдісны канмуса асшӧрлун XIX-XX нэмъясын.


Мӧд лунас Вярска сиктса культура шӧринын пансис Фин-йӧгра войтырлӧн конференция. Сылӧн темаыс - "Фин-йӧгра войтырлӧн кывъяс да культура - медбур практикаяс". Конференция вылӧ воисны 18 фин-йӧгра войтырсянь делегация. Фин-йӧгра войтырлӧн консультативнӧй комитетӧн веськӧдлысь Татьяна Клеерова юӧртіс кык вося удж йылысь. 

Сето вӧлӧсьтӧн веськӧдлысь майшасис школаын кыв велӧдӧм йылысь. Сетоса король висьталіс, кыдзи сійӧ сӧвмис фин-йӧгра войтыр йылысь этнографическӧй фильмъяс подув вылын (режиссёрыс Леннарт Мери - сёрӧнджын Эстмуса президентӧн лоӧма) да вӧзйис мӧвпавны кык кӧлена водзӧ, медым лоисны бурланьӧ вежсьӧмъяс. Венгрияысь Янош Пустаи ошйысис, мый вуджӧдӧма маддяр кывйӧ Пекка эпос да дасьтӧма кывкуд. ООН-са эксперт Дмитрий Харакка корис зільджыка пырӧдчыны правояс доръян войтыркостса уджӧ Латвияӧс да Венгрияӧс.

Неыджыд шойччыштӧм бӧрын делегатъяс уджалісны нёль секцияын. Кыдзи и век, медунаӧн вӧліны кыв мытшӧдъяслы сиӧм секцияын, кӧні ме сёрниті "Кыв поз" проект йылысь. Янош Пустаи бара жӧ дасьтӧма ыджыд доклад сы йылысь, кутшӧм мытшӧдъяс кыв видзӧмын эм фин-йӧгра войтырлӧн и мый колӧ вӧчны матысса кадас. Ӧлӧдыштіс фин-йӧгра канмуяс сыысь, мый оз вермыны дорйыны Россияысь ичӧт лыда фин-йӧгра рӧдвужсӧ. 

Карелияысь Наталья Антонова юксис выль проектӧн. Ведлозеро сиктын найӧ кыпӧдӧмаӧсь ас тшӧт весьтӧ кык судтаа карел кыв керка, кӧні вӧдитчӧны "кыв поз" велӧданногӧн. Карел керкаас волӧны рочмӧм челядь, кыдзи садикӧ (та кындзи сиктас эм бюджетнӧй садик); накӧд лунтыр сёрнитӧны карел кывйӧн ворсігӧн, велӧдчигӧн да уджалігӧн. Садикӧ котралысьяслысь босьтӧны сӧмын джын донсӧ, и дерт жӧ, татчӧ артмӧма кык во вылӧ ӧчередь. Жаль сӧмын, мый садик бӧрын школаас чужан кывсӧ велӧдны позянлуныс абу.

Аслыссикасӧн вӧліны эстмуса рытъясыс. Тартуын тӧдмасим эст йӧзкостса сьыланкывъясӧн (рунаяс, псаломъяс, духовнӧй стихъяс сьылісны вит мужичӧй да ворсісны шылада инструментъясӧн) да удмурт сьыланкывъясӧн (Николай Анисимов, Маръя Корепанова да эст мужичӧй лӧсьӧдӧмаӧсь торъя котыр).

А Вярска сиктын гӧсьтъясӧс чуймӧдіс сето (сету - рочӧнджык) войтыр. Эстмуса веськӧдлысьяс да туялысьяс оз лыддьыны найӧс торъя войтырӧн; шуӧны эстъяслӧн этнографическӧй котырӧн. Сетолы колян во лэдзӧмаӧсь лӧсьӧдны торъя вӧлӧсьт, кӧні олӧ сӧмын 3500 морт, да сетӧмаӧсь позянлун аслыныс веськӧдлыны. Мирын ставнас арталӧмаӧсь сетосӧ 12500 гӧгӧр мортӧс.

Нималӧ сету традицияӧн. Быд во моз тӧлысьӧ фестиваль дырйи найӧ бӧрйӧны аслыныс корольӧс (наместникӧс).

Миянӧс тӧдмӧдісны сетоса йӧзкостса сьыланкывъясӧн. Уна гӧлӧсӧн сьылӧмыс пырӧма ЮНЕСКО-лӧн наследиеӧ. Гӧсьтъяслы мойвиис сьылыштны да ӧтлан йӧктыштны гудӧк улӧ.

Комментариев нет:

Отправить комментарий