Кыв поз. Кӧкъямысӧд чукӧртчӧм

Со и нуӧдім "Кыв поз" проектлысь кӧкъямысӧд и бӧръя практикум. Нимкодь, мый пыр выль семьяяс локтӧны, сідзкӧ эм асланыс кӧсйӧм вежсьыны да вежны ас гӧгӧртассӧ.
  

Семинар кежлӧ дасьтысигӧн юрын бергалісны ас синмӧн казялӧмторъяс. Кор тӧдмалі, мый лавкаын вузасьысьыс коми, сыкӧд быд ньӧбасигӧн сёрнитім чужан кывйӧн. Ӧтчыдысь лавкаас вӧліны нин "клиентъясыд", кодъяс варовитісны рочӧн, и менам тӧдса вузасьысьыд мекӧд роч вылӧ жӧ вуджис, кӧть ме и зіли комиасьны.

Татшӧмыс, чайта, унакӧд вӧлі, и быдӧн вермас казьтыштны ас олӧмсьыс, кор ковмис  чужан кывтӧ вунӧдны йӧзаинын да рочасьны рӧдвужыдкӧд да тӧдсаясыдкӧд. Та йылысь и сёрнитім бать-мамыскӧд бӧръя практикум дырйиыс.

Видлім гӧгӧрвоны, мый колӧ вӧчны, медым челядьным эз яндысьны сёрнитны комиӧн. Уджсӧ тэчим сэтшӧм ногӧн, медым ӧтлан корсьны помкаяссӧ да петан туйсӧ. Ӧтув мӧвпыштӧмӧн, миян артмис, мый ми яндысям комиӧн сёрнитны йӧзаинын со татшӧм помкаяс вӧсна:

* Вежавидзам мукӧд кывъя йӧз дырйи;
* Полам йӧзлӧн лёк реакцияысь;
* Юрын пукалӧ, мый татшӧм ногӧн и колӧ век вӧчны;
* Миянӧс тадзи быдтылісны-велӧдісны;
* Пытшкӧсса психологическӧй барьер;
* Ог кужӧй бура сёрнитны комиӧн.

Бать-мамкӧд жӧ видлім вочакывъяс сетны "мый вӧчны" юалӧм вылӧ. Миян вӧзйӧмъяс со татшӧмӧсь:
* Вежны медводз асьнымӧс, видзӧдласнымӧс;

* Оз ков сетчыны да вуджны роч кыв вылӧ;

* Нуӧдны бать-мам костын гӧгӧрвоӧдана удж;
* Сёрнитігӧн бӧрйыны сӧмын ӧти стратегия: быдлаын и век сёрнитны комиӧн.

Бать-мамлы колӧ гӧгӧрвоны, мый ми кӧ кутам яндысьны комиӧн сёрнитны йӧзаинын, тайӧ вуджас и челядьнымлы. Ныв-зон кутасны чайтны тайӧ нормаӧн.

2019-ӧд воын "Кыв поз" практикумъяс ог нин нуӧдӧй, но сы пыдди "Шуда котыр" коми семьяяслӧн клуб водзӧ кутас чукӧртчывны. Миян планын лоасны:

* челядьлы коми гижысьяскӧд паныдасьлӧмъяс;

* музейясын челядьлы комиӧн экскурсияяс нуӧдӧм;

* бать-мам да челядькӧд ӧтувъя уджъяс - небӧг лыддьӧм;

* кывбур лыддьысьяслысь конкурс нуӧдӧм да гаж лӧсьӧдӧм;

* семьяясӧн мойдъяс пуктӧм да гаж нуӧдӧм, и с.в.

Ӧшым тӧлысьын бара на дасьтам выльвося гаж, кӧні челядьным вермасны комиӧн сьывны "Коз пу" сьыланкыв, лыддьыны коми кывбур да ворсыштны Кӧдзыд пӧлькӧд да Лымнывкӧд.

Практикум дырйи кӧ бать-мам уна сёрнитісны, та кадӧ миян челядь вӧчисны. Налӧн став выныс вӧлі пуктӧма, медым дасьтыны муса мамъясыслы козинъяс. Ӧд вӧльгым тӧлысьлӧн быд коймӧд шойччан лунӧ ми пасъям Мам лун. Кыдзи нӧ позьӧ бокӧ кольны татшӧм гажысь миян челядьлы?

Медбур козинӧн мамъяслы лоӧны дзоридзьяс. Буретш быдса букет бумагысь вӧчисны челядьным Мария Игушева да Марина Лопырева веськӧдлӧм улын, а дзоляджыкъяслы отсасисны педколледжса студентъяс Василина Зайкова да Алина Лодыгина.

Челядькӧд фотоясыс М.А. Лопыревалӧн.

Воддза паныдасьлӧмъясыс: медводдза, мӧд, коймӧд, нёльӧд, квайтӧд да сизимӧд.

Унджык юӧр лыддьӧй проектлы сиӧм "КЫВ ПОЗ" котырысь Контактын.

"Кыв поз" проект олӧмӧ пӧртӧ "Коми войтыр" ӧтмунӧм Коми республикаса национальнӧй политика министерство отсӧгӧн да "Лукойл" сьӧм вылӧ.