Квест-ворсӧм да викторина

"Сыктывкар - коми кар" квест-ворсӧм да викторина нуӧдіс "Шуда котыр" коми семьяяслӧн клуб косму тӧлысь 21-ӧд лунӧ.

Урчитӧм кадӧ чукӧртчим Степан изэрдса Ленин паметник дорӧ, юксим куим котыр вылӧ да гӧгӧрвоӧдім уджсӧ.

Мый татшӧмыс квест? Ми ног со мый:
Корсям
Вочакыв
Едъявтӧг
Сюся

Тӧдмалам

Быд котырлы колӧ вӧлі карта серти мунны медводдза адрессянь бӧръяӧдз да корсьны комиӧдӧм вывескаяс вылысь колана кывъяс, а колана кывъяссьыс - ӧти шыпас, кодӧс колӧ содтыны ВОЧАКЫВЙӦ. Став шыпассӧ кӧ аддзан, артмас кыв да вайӧдас коланаинӧдз.

Куимнан котырыс воисны индӧминӧдз да тшаюйтісны. А сэсся нуӧдім "Ас ворсӧм" моз жӧ викторина. Буретш та кадӧ жӧ сэні экскурсия вылын вӧліны мамъясыскӧд нывъяс, кодъяслы вӧзйим тшӧтш пырӧдчыны викторинаӧ. Ворсісны "Нывъяс" да "Зонъяс" котыръяс, кодъяслы отсасисны мамъясыс. 

Викторина комиӧн лоис КВИЗ, тайӧ -
Кывзы
Вежӧрт
Инды

Зумыда

Экран вылын вӧлі нёль категория: "Сыктывкар", "Иван Куратов", "Коми му" да "Коми оласног". И быд категорияын нёль юалӧм. Юалӧмлӧн сьӧкыдлун серти и дон - 5-сянь 20-ӧдз. Быд категорияын ӧти юалӧм - творческӧй.

Творческӧй уджын колӧ вӧлі лыддьыны Иван Куратовлысь "Коми кыв" кывбур, ӧдйӧ шуавны коми кывпесанъяс, вербаӧн лачкыны да бурсины (Верба лун ӧд!), висьтавны тулыс йылысь кывбур.

Куим коми зон юрвем песӧм бӧрын вермисны куим роч нылӧс 95:80 тшӧтӧн. Быдӧн муніс козинӧн да кыпыд руӧн!

Казьтылӧм помысь колим ас йылысь пасйӧд пызан дӧра вылӧ. Уліас эм на места. Сідзкӧ позьӧ на волыны тайӧ гажаинас да водзӧ содтыны.

Коді эз тӧдмав гажаинсӧ, шуам - тайӧ Иван Куратовлӧн литературнӧй музей. Зэв ыджыд аттьӧ музейӧн веськӧдлысь Диана Григорьевна Холоповалы тшаюйтны лэдзӧмысь!