воскресенье, 19 января 2020 г.

Ёжик да Урпи

 Коми семьяяслӧн "ШУДА КОТЫР" клуб котыртіс С.Я. Маршак нима Коми Республикаса Вужвойтырлӧн челядь небӧгаинын Анастасия Сукгоевакӧд паныдасьӧм да сылысь "Вильыш Урпи" выль небӧг нимӧдӧм.
Небӧгаинын зільысь да "Шуда котырӧн" веськӧдлысь Людмила Камбалова тӧдмӧдіс чукӧртчысьясӧс гижысьлӧн олан туйӧн да гижан уджӧн. Анастасиялӧн "Вильыш Урпи" (2019) - тайӧ мӧд небӧг нин. Медводдзаыс петавліс "Цветущий ёжик" ним улын рочӧн 2018-ӧд воын Коми гижысь котыр отсӧгӧн. Унджык гижӧдыс дасьтӧма челядьлы, та вӧсна и аддзысьлӧмыс вӧлі сыктывкарса челядькӧд да бать-мамыскӧд, кодъяс пырӧны "Шуда котыр" клубӧ, да нӧшта на и челядь небӧгаинын.
Анастасия Сукгоева чужӧма Сыктывдін районса Сёська сиктын 1982-ӧд воын. Помалӧма И.А. Куратов нима Сыктывкарса 1-дза номера гуманитарно-педагогическӧй колледжысь социально-юридическӧй юкӧн, Москваса финансово-юридическӧй академиялысь Киров филиал «юриспруденция» специальносьт серти (уджысь орӧдчытӧг). Олӧ Сыктывкарын, уджалӧ антимонопольнӧй службаын.

Анастасия Сукгоева гижӧ комиӧн да рочӧн кывбуръяс да проза, ёнджыкасӧ челядьлы. Гижны босьтчӧма медводз комиӧн школаас велӧдчигӧн на, но кывкутӧмӧн кутчысьӧма гижан уджас мамӧн лоӧм бӧрын. «Лестукъясысь вурӧм эшкын» — медводдза висьт, кодӧс гижӧма верстьӧлы (2017).
Гижӧдъясыс петавлӧмаӧсь «Би кинь», «Войвыв кодзув», «Радуга» да «Арт» республикаса журналъясын, «Сибирячок» журналын, челядьлы «Эжвинские искорки» чукӧрын. 
2018-ӧд воын шедӧдӧма Александр Лужиков нима литературнӧй премия.
Коми гижыськӧд паныдасьны локтісны небӧгса геройясыс - Ёжик, Кӧч, Кань, Шыр да Урпи. Найӧ ӧтвыв и чолӧмалісны чужан лунӧн "небӧгсӧ". А сэсся велӧдісны кывпесан.... Зэв аслыспӧлӧса велӧдісны кывбертлансӧ. Видзӧдам....:





Выль небӧг петӧмӧн чолӧмавны волісны кык Алёна - Старцева, коді вӧлі Шомысова, да Нестерова, коді вӧлі Старцева (век на тай тайӧ ов вежӧмыс торкӧ мукӧдсӧ). Анастасия пӧ локтӧма "Арт" журналбердса ЛИТО-ӧ во куим сайын да зэв зіля гижӧ. Сиам пӧ пырны Коми гижысь котырӧ.



Челядь пиысь некымынӧн велӧдісны Анастасия Сукгоевалысь кывбурсӧ. Ёгор Рассыхаев, Костя да Тимоша Козловъяс, Миша Савин висьталісны выль небӧгысь коми кывбуръяс. 


Имениннича шуис, мый ЛИТОын ӧдйӧ ёртасьӧма да лоӧма ас мортӧн. Кывзысьяслы сійӧ висьталіс гижан удж йывсьыс да лыддис ассьыс кывбуръяссӧ. Мыйкӧ гижлӧма комиӧн да вуджӧдӧма, а мукӧдсӧ рочӧн, и сэсся - комиӧдӧма. Со тадзи и чужисны кык медводдза небӧгыс. Меддонаясыс пӧ пырисны "Выльыш Урпи" небӧгӧ.

Бура донъялӧ кывбуръяссӧ коми литература небӧг дасьтысь Эльвира Полякова. Анастасия Сукгоевалысь некымын кывбур сійӧ бӧрйӧма нин, медым пыртны велӧдчан небӧгъясӧ. Кужӧ пӧ челядьлы кывбуръяссӧ гижны - эм ныв-поснилы лӧсялана уна образ, шы петкӧдлан кывъяс, аллитерация. 

Та кындзи, челядьӧс ворсӧдіс  - "Кепысь" кывбурӧн пӧ позьӧ челядьлы котыртны физкультминутка.

Чукӧртчӧм кежлӧ колӧ вӧлі серпасавны дзоридзалысь ёжикӧс. Коді эз удит, найӧ серпасасисны аддзысьлігӧн. А сэсся гижысь аслас уджъёртъясыскӧд донъялісны найӧс. Вермысьяслы - Рита Рассыхаевалы, Тимофей Козловлы, Миша Нестеровлы - вичмӧдісны козинъяс (пазлъяс).

 Тшай юигӧн да кывзігӧн ӧдйӧ и лэбыштіс кадыс. А эштӧдім аддзысьлӧмсӧ ӧтувъя фотоӧн.



Комментариев нет:

Отправить комментарий