воскресенье, 2 февраля 2020 г.

Сӧлӧ баблы - 90 арӧс

Во нёль нин кӧсъям вӧлі ветлыны Сӧлӧ баб дорӧ - мойдысь, челядьлы гижысь дорӧ. И со миян кӧсйӧмным збыльмис сӧмын талун - коми семьяяслӧн "Шуда котыр" клуб сёрнитчис да ветліс челядьлы нималана гижысь дорӧ. Таво сылы тырӧ 90 арӧс. Бурджык помкаыс волыны сы дорӧ да чолӧмавны чужан луннас и абу. 


Сӧлӧ баб, рочӧн кӧ - Соломония Васильевна Пылаева - олӧ Сыктывкарбердса Куимтыдорын. Посёлокыс ю сайын. Орбитасянь тайӧ ичӧтик овмӧдчаніныс бура тыдалӧ, сэтчӧдз куим километра и эм. Но колӧ вуджны и Эжва ю, и Шардополой. Тӧвнас вӧчлӧны тӧвся туй. Буретш сы кузя и воӧдчим талун.


Сӧлӧ бабкӧд паныдасьны отсаліс Куимтыдорса небӧгаинӧн веськӧдлысь Ирина Нестерова. Унаысь сыкӧд ковмис йитчыны, медым тӧдмавны, кыдзи воӧдчыны ӧнія кадӧ (муӧдз копыр сылы!) Сійӧ и йитӧдсӧ кутӧ тётя Сонякӧд (тадзи ас костаныс шуӧны), и котыртлӧ сыкӧд аддзысьлӧмъяс. Сӧлӧ бабӧс пиыс вайӧдіс машинаӧн ӧдзӧс дорӧдзыс, киӧдыс кутӧмӧн донатор моз пыртім жырйӧдз. (А таӧдзыс ми кывлім, мый, кор челядь корӧны Сӧлӧ бабӧс ас дорас мойдны, сэки асьныс и гургывлӧны даддьӧн ӧтарӧ-мӧдарӧ.)

Клубын посёлокса нывъяс петкӧдлісны Сӧлӧ баблысь кык мойд: ӧтисӧ комиӧн (найӧ коми кывсӧ со тадзи велӧдӧны), мӧдсӧ - рочӧн. Ирина Нестеровакӧд нывъяс котыртӧмаӧсь "Сӧлӧ баблӧн мойдъяс" театр да унаысь нин петкӧдчывлӧмась йӧз водзын:

А сэсся Соломония Пылаева "мойдіс": висьталіс чӧрт йылысь да война кадся вӧвлӧмтор йылысь. Унатор тӧдмалім и ас олӧм йывсьыс: кыдзи батьсӧ арестуйтӧмаӧсь да лыйлӧмаӧсь, кыдзи ковмӧма пышйыны Тбилисиӧ, кыдзи бӧр воӧмаӧсь Комиӧ санитарнӧй поездӧн (муртса абу кольӧмаӧсь, кор кутшӧмкӧ станция вылын петавлӧмаӧсь пӧсь вала)... 

А мойдны кутӧма "Тысяча и одна ночь" небӧг лыддьӧм бӧрын. Гижнысӧ босьтчӧма ёна сёрӧнджык нин, кор письмӧӧн шыӧдчӧма Коми гижысь котырӧн веськӧдлысь Геннадий Юшков дорӧ, коді и вӧзйӧма водзӧ гижны. Кӧть эськӧ и грамотаыс абу вӧлӧма (коми кыв школаын абу велӧдлӧма), зільӧма мойдъяссӧ тэчны да йӧзӧдны.

"Шуда котырӧ" пырысь бать-мам да налӧн ныв-зонкӧд фотографируйтчим паметь вылӧ, козьналім Сӧлӧ баблы коми серъяса носки да дзоридзьяс. Тшаюйтігӧн на водзӧ варовитім да тӧдмалім олӧмсӧ.

2 комментария:

  1. Зэв бур паныдасьӧм, нӧшта видео вылӧ колӧ вӧлі пасйыны. А Сӧлӧ бабыд гижӧ на выль мойдьястӧ?

    ОтветитьУдалить
  2. Видео вылӧ сёрнисӧ гижӧма. Сійӧ оз нин гиж (синмыс оз аддзы и грамотасӧ ас кадӧ эз судзӧдлы), а сӧмын мойдӧ да казьтывлӧ олӧмсьыс.

    ОтветитьУдалить