Коми фольклор йылысь сёрнияс

Ӧтпырйӧ некымынлаӧ менӧ корлісны, медым сёрнитны аслам туялӧмъяс серти йитчӧм темаясӧн.

Велӧдӧм сӧвмӧдан Коми Республикаса институтысь Светлана Мусанова корліс коми кыв да литература велӧдысьяслӧн семинар вылӧ. Сылӧн темаыс – урокъяс вылын фольклор велӧдӧм. Кӧть и урокъясыс вежоннас овлӧ ӧтчыдысь ли кыкысь (мукӧд урокыс – кыв серти), вичмӧдӧма жӧ коми фольклорлы часъяс. Велӧдӧны мойдъяс, преданиеяс да легендаяс, эпос да сьылан жанръяс, нӧдкыв да шусьӧгъяс, челядь фольклор да ворсӧмъяс. Ас сёрниын ме гӧгӧрвоӧді, мый фольклор – тайӧ ловъя, вежласяна да сӧвмысь система. Водзӧ сёрниті сы йылысь, мый Кыв, литература да история институтын уджалӧны коми фольклор туялысьяс, кодъяс быд во котыртӧны экспедицияяс, нуӧдӧны некымын нырвизь серти туялӧмъяс; петкӧдлі велӧдысьяслы медшӧр йӧзӧдӧм уджъяссӧ.

Семинарӧ позьӧ вӧлі пырӧдчыны онлайн; ӧтуввезйын эм гижӧм видеоыс. Ӧтитор шогӧдіс бӧрынджык: видзӧдны вӧлі гижсьӧма сӧмын 13 морт (!). Семинар дырйи висьтасисны и менам уджъёртъяс.

Сыктывкарса канму университетын быд во нуӧдӧны Февральса лыддьысьӧмъяс, найӧ сиӧмаӧсь университет чужан лунлы. Зэв нимкодь, мый коми кафедра век котыртлӧ секцияяслысь уджъяссӧ, и мукӧд учрежденньӧысь уджалысьяс – кафедраса петасъяс жӧ – вермӧны паныдасьлыны «альма-матерын». Тавося паныдасьлӧмыс ёнджыкасӧ вӧлі сиӧма коми челядь литературалы; сёрнитісны литература да кыв туялысьяс. Ме сёрниті коми фольклорса выль герой син пӧртмалысь Бисин Миш йылысь. Нӧшта ӧти позянлун варовитны комиӧн да коми йылысь.

Сыктывкарса коми культура шӧринысь худрук Екатерина Битнер виччысьтӧг корис сёрнитны школьникъяс водзын «Научный StendUp»» уджтасын, локтасны пӧ Коми национальнӧй гимназияысь 11-ӧд класса велӧдчысьяс. Темасӧ шуим тадзи: «Коми томуловлӧн гажӧдчан кад: рытпук да дискотека». Тӧдлытӧг паныдасьлӧм вылӧ воисны нӧшта на кык школаысь велӧдчысьяс, ставнас морт ветымын. Водзвыв кори сайӧдны телепонъяс – и тайӧ ёна отсаліс бурджыка ӧта-мӧдӧс кывны.

Видлі налы петкӧдлыны, мый ӧткодьыс коми рытпукъяслӧн да ӧнія кадся дискотекаяслӧн, мыйын торъялӧмыс. Бура кывзӧмысь ворсӧді найӧс – петкӧдлі «Гизь-гизь, гораньӧй» ворсӧм. Кыдзи век, зонкаяс дышпырысь петӧны ворсны.

Сыктывкарса канму университетысь Елена Остапова вӧзйис этнопедагогика серти нуӧдны лекция начальнӧй классӧн веськӧдлыны кӧсйысь студентъяслы. Неыджыд котыр, нёльӧд курс, гӧгӧрвоысь синъяс. Кыдзкӧ выйӧн моз муніс сёрниыс. И ас йылысь, велӧдчӧм да туялӧмъяс йылысь удиті гарыштны, и темакӧд йитчӧмторъяс йылысь тшӧтш. Челядь фольклор да йӧзкостса ворсӧмъяслӧн эм ыджыд быдтан-сӧвмӧдан вын. И тайӧн колӧ вӧдитчыны ӧнія кадӧ.

Эг вермы не петкӧдлыны налы ыж шегйӧн да кӧр гыжйӧн ворсӧмъяс. 

Серпасъясыс аслам да мукӧдыслӧн, кодъяс котыртісны тайӧ чукӧртчылӧмъяссӧ.