МАНАРАГА. КВАЙТӦД ЛУН

 КВАЙТӦД ЛУН. МАНАРАГА Ю

Манарага из йылӧ кайӧм унаӧс бордйӧдіс. Медшӧрсӧ вӧчӧма – сэтчӧ кайлім ставным. Ӧні позьӧ тэрмасьтӧг мунны тӧдса нин туйті.

Час сизимъясын садьмим да сёйим. Гӧтыркӧд ветлім купайтчыны. Палатка чукӧртігӧн вывлань кайисны ныла-зонма. Сэтшӧм шурыда восьлалісны, мый эг удитӧй юавны кодъяс да кытысь.

Сизимӧд лунлӧн мог – воӧдчыны Манарага ю вожӧдз да войколавны Зигзаг перевалӧдз. Бӧрыннас пӧ, пажун кадӧ, мӧвпыштам кӧні палаткаяссӧ зэвтны.

Медводдзаяс лыдын лэччим лагерсянь Манарага ю дорӧдзыс. Ми бӧрын локтысьяс шуисны, мый Печораса ӧти нывбабалы пӧ коскас кочкӧма. Кыкӧн мунім воча, но миян отсӧг эз ковмы.

Тӧдса туйті мунны вӧлі кокни. Поводдяыс бур – шондіа, жар. Ӧтилаын, кӧні тыдалӧ Манарага из йыв да мыш сайын ты, фотографируйтчим. 

Водзӧ восьлалігӧн снимайтім ош кок туйяс. Паныдалім палатка, кӧні мужичӧй да нывбаба вӧлі чукӧртӧны нопъяснысӧ. Асьныс Москваысь. Шуисны, мый ныла-зонма, кодъяс вӧлі кайӧны Манарага из йылӧ, Улыс Новгородысь пӧ. Ӧтлан пӧ локтім Народа изсянь, но найӧ тэрыбджыкӧсь да водзӧ мунісны. Нылыслӧн чужӧмыс да нырыс сотчӧма шондісьыс. Миян котырысь нывбабаяс вӧзйисны москвасалы гожъялӧмысь крем.

Пажун кадӧ воим тӧдса бипур дорӧ, кӧні войколалім нин куим лун сайын. Сайӧдлӧм сёян пакетъяс некод абу вӧрӧдӧма.

Сёйӧм бӧрын кутім мӧвпавны, мый вӧчны: тані войколавны, кӧні эм пес, либӧ мунны нӧшта куим километра да вӧлисьти – пессӧ сэні сьӧкыдджык пӧ аддзыны, быдмӧ сӧмын бадь. Инструкторным кӧсйис кольччыны, медым бурджыка шойччыны мичаинас. Гӧлӧсуйтім – унджыкыс кольччӧм вӧсна. Тӧд вылын кутім, мый аскинас колӧ мунны сӧмын 10 км кымын.

Ӧбед бӧрти йӧзыс узьыштісны, шойччисны. Мыськасисны, купайтчисны, косьтысисны; корсисны снимайтчыны мичаинъяс. Палаткаын куйлігӧн унаысь кывлі воськов шыяс: тайӧ туристъяс мунӧны Манарагалань. Кор петі палаткаысь, шуисны, мый мунісны ыджыд нопъясӧн найӧ, коді кутас Косью кузя кывтны пыжӧн. Сёйигӧн нӧшта на подаяс мунісны горув: вӧзйим тшай, эз юны – тэрмасьӧны войколаланінӧдз.

Рытъя сёйӧм бӧрын бипур дорын варовитім, а сэсся ворсім да сьылім. Колипкайяс миян пӧвстын эз вӧвны, сьылім кыдзсюрӧ. Юргисны и коми да роч, финн, мари да немеч кывъяс вылын сьыланкывъяс. Виччысьтӧм «толерантносьт».

«Мафияысь» ворсӧм бура муніс. Ӧти мафиозиӧс эрдӧдім, но мӧд мафиозиыс вӧлӧма зэв укшальӧн – бӧръя мортсӧ тотшкыны удитіс.

А сэсся Женя нуӧдіс психологическӧй текст. Кык часысь унджык та вылӧ воштім. Войӧдзыс тестируйтіс, и эз коль кад мукӧд ворсӧм вылас.

Лыддьӧй сідзжӧ:

Интаӧдз туй,

Медводдза лун,

Мӧд лун,

Коймӧд лун,

Нёльӧд лун.

Витӧд лун.

Водзӧ лоӧ на.