СИЗИМӦД ЛУН. ЗИГЗАГ
Асывнас
муртса удитім сёйны, локтӧ нин туристъяслӧн ыджыд котыр. Вӧлӧмкӧ,
войколалӧмаӧсь метра 300 сайын. Кык вежон пӧ кутам туриставны; кӧсйӧны ылӧджык
лэччывны. Сэтчӧдз ми эг волӧй – местасӧ ог тӧдӧй.
Туйӧ
петім сапӧгӧн, медым не вежлавны кӧм: тані изъяса ордым вежласьӧ нюраинӧн да ю
вомӧн вуджӧмӧн. Тӧдса ю вуджим кӧмтӧг. Чайті, мый кокӧй йизис. Мӧд ю вуджим
изсянь из вылӧ чеччалӧмӧн. Тані пасьталім кокни кӧм и мунім инструктор бӧрсянь
гӧраясӧ вывлань – колӧ медводз вуджны Зигзаг перевал. Ӧдыс вӧлі надз,
тэрмасьтӧг. Ордымным вошласис.
Мунігӧн
тӧдмалім, мый некутшӧм манарагаса зонка абу. Сы йылысь висьтсӧ инструкторным
лӧсьӧдӧма и висьтавлӧ походъясын.
Лун
шӧр кадӧ воим гӧгрӧс ты дорӧ, кӧні пажыналім да шойччыштім. Наташа да Женя
купайтчисны. Б-р-р-р! Кокӧс некымынысь кӧтӧдлі жӧ, окота вӧлі купайтчыны, но эг
лысьт.
Водзӧ
восьлалім инструктортӧг, коді муніс кольччысьяскӧд. Зигзаг перевалсянь лэччим
увлань – чеччалім изсянь из вылӧ, медым не кӧтӧдны кӧм. Тані сылӧ лым, ва
визувтӧ быд из костті. Лэччим-лэччим да ӧтилаын джӧмсувтім: эг тӧдӧй кодарланьыс
кежны. Ковмис виччысьны Сергейсӧ да юавны. Вӧлӧмкӧ, колӧ сӧмын кежны
веськыдладорас, неуна вывлань кайны и воан пӧ Валдик перевалӧдз. А сэсянь нин
тыдалӧ лагер местаным.
Миянлы
сэтшӧм окота вӧлі ӧдйӧджык воӧдчыны войколаланінӧдз, мый ниӧти эг сувтлӧй шойччыны,
сёйыштны да ва юны. Гашкӧ, тайӧ и ёна мудзтӧдіс менӧ. Видзӧдӧм серти, ми мунім
ёна унджык километр.
Сёян-юан
палатка вӧлі сулалӧ ас местаас, нинӧм абу вӧрӧдӧмаӧсь. Тайӧ буртор!
Валдик
сувтанінын бара вӧлі кӧдзыд да тӧла. А ӧд сӧмын кык перевал вуджим – Манарага
вожсянь Бӧлбанъю вожӧдз! Сэтшӧма торъялӧ поводдяыс. Сёйӧм бӧрын гӧтыркӧд пырим
палаткаӧ да пыр жӧ и унмовськӧдчим. Корисны эськӧ компот юны, но вын эз вӧв. Эз
вӧв окота весиг пинь весавны.
Мудз
вылӧ видзӧдтӧг, некымынӧн ветлӧмаӧсь эновтӧм штольняӧ, кытысь перйылӧмаӧсь
гӧраса хрусталь. Сэтчӧ абу веськалӧмаӧсь – пыраніныс тырӧма лымйӧн. Тыдалӧны на
рельсъяс. Аскӧд вайисны кернъяс – пыдіысь перйӧм из пӧрӧда.
Лыддьӧй сідзжӧ:
Водзӧ лоӧ на.
Комментариев нет:
Отправить комментарий