воскресенье, 1 августа 2021 г.

МАНАРАГА. КӦКЪЯМЫСӦД ЛУН

КӦКЪЯМЫСӦД ЛУН. ЖЕЛАННӦЙ


Водз водім, водз и садьмим. Мукӧдыс кык часын чеччылӧмаӧсь нин, паныдалӧмаӧсь туристъясӧс, кодъяс мунӧмаӧсь водзӧ. Ми кор вӧлі дасьӧсь нин петны туйӧ, тыдовтчисны куим мужичӧй. Сёрниӧ воим – Свердловск обласьтса Леснӧй посёлокысь. Ёна шмонитім, быттьӧ важӧнсянь нин тӧдсаӧсь. Ӧтлаын снимайтчим. Мыйлакӧ мукӧдыскӧд тадзи эз вӧв.

Бӧръя лунлӧн мог – воӧдчыны Желаннӧй базаӧдз. Дас вит кымын километра мунны тӧдса нин туйті. Шорысь медводдзаысь казялім дас сантиметра кузьта чериясӧс – кунжа пӧ.




Петім медводдзаясӧн, сапӧгаӧсь – тӧдам нин, мый изъя туй вежласьӧ нюраинӧн да шоръясӧн. Нопъяс кокниджыкӧсь, мунсьӧ бура. Шойччим Бӧлбанъю вуджӧм бӧрын да кӧр видзысьяс дорын. Чом дорас олім джын час. Сёрнитыштім кӧр видзысьяскӧд, ньӧбим кос чери (ӧти нывбаба – кӧр ку), вердім чери лыӧн понъяссӧ. Чуймалім, мыйла пимияс (либӧ буркияс) вузавлӧны 20 сюрсысь, ӧд татшӧм сьӧмӧн походӧ оз ветлӧдлыны! Зэв тешкодь вӧлі казявны чом дорысь кӧляска, велосипед. А шор бокысь аддзи ас вӧчӧм вездеход-чача. Таладорас кӧръяссӧ видзӧны вӧвъясӧн. Ачым татшӧмторсӧ медводдзаысь аддза.

Чом да палатка кындзи кӧр видзысьяс тувъялӧны сарай кодь - арся поводдя дырйи пӧ бурджык сэні овны.


Мен вӧлі зэв интереснӧ видзӧдлыны буркияс вылысь серъяс да мичмӧдӧмъяс. Бурки, тяпи, кӧр ку, мукӧд кӧм вузалӧны жӧ.




Кор вӧлім на кӧр видзысьяс дорас, сэтчӧ матыстчис «Урал» машина. Локтісны выль туристъяс. Ӧти нывбаба петіс ичӧт понкӧд. Пыр жӧ и думыштім – вайисны жертва пыдди.

Муртса муныштім кӧр видзысьяс дорысь, дасьтім ӧбед. А сэсся пӧшти сувтлытӧг тюрим «Желаннӧй» базаӧдз. Нюрті собигӧн гӧгӧрвоим, мыйла базасӧ шуӧны «желаннӧйӧн». Мӧдтор юрад оз и во.



«Желаннӧй» база вӧлі восьтӧма гӧраясысь озырлун перйысьясӧн. Но вочасӧн лои турбазаӧн, кӧні эм «Еркусей» ӧтуволанін. Дерт, сэні, сервисын абу сэтшӧм, кыдзи ошкӧма ӧтуввезйын. Ӧтуволанінса кӧзяинсӧ ковмис биӧн корсьны. Гажа юра мужичӧйыдлы унаысь ковмис висьтавны, мый миянлы колӧ. Душын мыссьыны удитісны некымынӧн, сэсся би кусі, ва оз лок. Та кадӧ удитім пуны картупеля шыд (сёян-юана сумка виччысис миянӧс тані) да видлыны «Манарага» настойка. А сэсся походса буссӧ мынтӧдім саунаын (и сэні душыд эз уджав).





Вӧлі позянлун зарадитны телепонъяс, узьны вольсалӧм крӧватьын да шебрас улын. Став кӧлуйыс тані фирменнӧй. Ӧти жырйын олім нёль мортӧн.



База вылӧ воисны войколавны Москваысь выль туристъяс – шашлыкӧн, ва дозмукъясӧн, ичӧтик понйӧн, корсисны вай-фай (тайӧ дивӧсӧ вӧзйӧ жӧ базаса сайтыс). Бӧрыннас нин дӧвгис, мый позьӧ вӧлі найӧс ыстыны Барков гӧра йылӧ….

Лыддьӧй сідзжӧ:

Интаӧдз туй,

Медводдза лун,

Мӧд лун,

Коймӧд лун,

Нёльӧд лун,

Витӧд лун,

Квайтӧд лун,

Сизимӧд лун,

Водзӧ лоӧ на.


Комментариев нет:

Отправить комментарий