Гуся медальяс да орденъяс

Коми кывъя газетъяс лыддигӧн аддза век ӧти и сійӧ жӧ кыв нормаяс торкалӧм. Ог тӧд, кодлы да кыдзи, но менӧ тайӧ ёна дӧзмӧдӧ. Сёрниыс мунӧ медаль, орденъяс комиӧн гижанног йылысь. Мыйлакӧ нимъяссӧ гижӧны газетъясын рочӧн. 

Со, шуам, Кӧрткерӧс районса "Звезда" газетысь некымын шедевр:

- "вӧлі Трудового Красного знамени орден",

- "наградитӧма "Знак Почёта" орденӧн",

- "пасйисны "Трудовой Славы" 3 степеня орденӧн",

- "За трудовое отличие" медаль,

- "К столетию В.И. Ленина" медаль,

- "Ветеран труда" медаль....

А мыйла ставсӧ рочӧн кольӧма?

Ставныс, дерт, гӧгӧрвоӧны, мый роч кыв, сӧветскӧй да россияна олӧм, культура пыр миян олӧмӧ унатор пырис, тшӧтш и медаль да орден, ошканпасъяс шуӧм-гижӧм. Ас костын ми вермам быд ногыс шуны  - дженьдӧдны и роч ногӧн шняпкыны-висьтавны. Ёнджыкасӧ тадзи и овлӧ. Сідз нин артмис, мый сёрниа кыв да литературнӧй кыв торъялӧны. И тайӧ абу сӧмын коми кывйын, тшӧтш и рочын.

Но кор газет-журналӧ гижӧны, небӧгӧ, эм ӧд редакторъяс, кодъяслы колӧ видзӧдны кыв сӧстӧмлун бӧрся. Селькоръясыд гижасны ас грамота, тӧдӧмлун да кужӧмлун серти. А кӧні нӧ газет редакторлӧн вежӧрыс? 

Оз ӧмӧй коми кыв тӧдысь редакторъяс гӧгӧрвоны, мый кыдъя-рочӧн гижигӧн няйтчӧдӧны коми кывсӧ? Аслыныс татшӧм уджсьыс любӧ кӧть абу?

Во вит сайын Коми республикаса термин да кыв гижанног лӧсьӧдан комиссия (рочӧн - РТОК) менам вӧзйӧмӧн дасьтыліс список - кыдзи татшӧм наградаяссӧ комиӧнджык гижны. Национальнӧй политика министерство пӧ пуктыліс ас сайтас тайӧ списоксӧ. Ачым тай эг аддзы, кӧть и корсьыси вель дыр. Ог жӧ гӧгӧрво, кодлы тайӧ вӧлі вӧчӧма и мыйла дзебӧны тайӧ "гусяторсӧ" йӧзсьыс?