МАНАРАГА. БӦРЪЯ ЮКӦН

МАНАРАГА. БӦРЪЯ ЮКӦН

Интасянь Сыктывкарӧ локтім выль пӧлӧс поездӧн. Важӧн нин эг ветлы тайӧ транспортнас да вежсьӧмъяссӧ ог вӧлі и тӧд. А тані эм кондиционер, зарядка, биотуалет и весиг душ. Душыд эз нин ковмы.

Микуньын чеччим да пуксим кӧртымалӧм автобусӧ. Гортын виччысис Ёгор пиӧй, коді некымын часӧн водзджык пырис гортӧ – сійӧ тшӧтш воис шондіа саридзын гожйӧдчӧм бӧрын. Сэтчӧ сійӧс мӧдӧдлім коми кывйысь бура велӧдчӧмысь.

Коркӧ походын юасьӧны вӧлі – мый босьтім и миянлы ниӧти эз ковмы. Вочакывйыс сюрис сӧмын гортӧ воӧм бӧрын – тайӧ зэрысь видзан плащ да запаснӧй ӧчки. Босьтлім пауэр-банк, но зарядыс вошӧма. Отсӧг вылӧ локтіс Сергей У. – Кулӧмдін районса Руч сиктысь, коми. Вӧзйис ассьыс пауэр-банксӧ – «верді» телепонӧс. Ми куимӧн ас костын ёнджыка и сёрнитім комиӧн поход чӧжыс, и мукӧдсӧ тӧдмӧдім коми кывйӧн, фольклорӧн, культураӧн. Казялі, мый миян котырысь пӧшти быд мортлӧн вӧліны коми вужъяс – кодлӧнкӧ бать-мамыс ли пӧль-пӧчыс коми (Лэт, Емва, Изьва вожысь).

Гортӧ воим да ӧтуввезйысь сюся лыддям, коді ветліс бӧръя воясас, а торйӧн нин таво сора тӧлысьын, Народа да Манарага изъяс вылӧ. Аддзам тӧдса чужӧмъяс, нимъяс, инъяс…

Походын вӧлі тешкодь кывны, мый 7 во чӧж нин «Транс-урал» компания котыртӧ котралысьяс пӧвстын войтыркостса марафон. 2017-ӧд воын котӧртысьяс чукӧртчылӧмаӧсь Войвывкытшбердса Уралӧ. Найӧ котӧртӧмаӧсь Желаннӧй базасянь Народа из йылӧдз да бӧр, кузьтаыс 50 километра. Медся тэрыб мужичӧйыс вӧчӧма тайӧс нёль час 46 минутӧн! Туристъяс ыджыд нопъясӧн татшӧм туйсӧ мунӧны куим лунӧн…

2018-ӧд воын котӧртӧмаӧсь нин Манарага изйӧдз 90 километра.

«Валдик» сувтланінсянь бура тыдалӧ ӧти латшкӧсіник из. Сылӧн эм неофициальнӧй ним. Сетӧмаӧсь нимсӧ туристлӧн ов серти, коді коркӧ юалӧма жӧ, кыдзи пӧ шусьӧ тайӧ изйыс. Кор тӧдмалӧма, мый изйыслӧн нимыс абу, вӧзйӧма шуны аслас овнас. Тадзи пӧ и кутісны туристъяс ас костас шуны – Юркин из.

Ӧтуввезйын походӧ ветлысьяс лӧсьӧдісны торъяс «сёрни». Ӧніӧдз на пукталам ӧта-мӧдлы фотояс, видеояс, юксям мӧвпъясӧн.

Ставным воам ӧти кывйӧ – гӧраяс миянӧс некыдзи оз кӧсйыны лэдзны, корӧны выльысь.

Ӧні колӧ бӧрйыны кад да ин. А мый гӧраясӧ ветлӧмыс лоас на, тайӧс ми тӧдам.

Лыддьӧй сідзжӧ:

Интаӧдз туй,

Медводдза лун,

Мӧд лун,

Коймӧд лун,

Нёльӧд лун.

Витӧд лун,

Квайтӧд лун,

Сизимӧд лун,

Кӧкъямысӧд лун,

Ӧкмысӧд лун.

Водзӧ оз ло.