Коркӧ студент кадӧ на ветлӧдлі турклубӧ, дасьтысим Из гӧраясӧ мунӧм кежлӧ. Сэки эз артмы (ӧні и помкасӧ нин ог тӧд), а со таво кӧсйӧмным збыльмис. Ветлім тӧдтӧминӧ гӧтыркӧд кыкӧн. Солькнитчим мӧд котырӧ, мыйӧн веськӧдліс ыджыд опыта инструктор Сергей Семяшкин. Сылӧн эм "Активный отдых Коми" ас котыр.
Миян мог - кавшасьны Народнӧй (Народа) да Манарага из гӧраяс йылӧ.
ИНТАӦ ТУЙ
Мунан кадыс кутіс матыстчыны да гӧгӧрвоим,
мый абу на дасьӧсь, унатор на колӧ ньӧбыштны, корсьны. Коліс дасьтысьны и
кӧдзыд, тӧла, зэра, и номъя-гебъя да жар поводдя кежлӧ. Ноп, спальник да
палатка медалім турфирмалысь.
Турагентствоӧ кор ветлім, сэки жӧ босьтім
ӧкмыс лун вылӧ сёян. Гортын нин видзӧдлім пакетас – тайӧ сублиматъяс (кос сёян,
сійӧс колӧ пӧсь ваӧн сорлавны), сало да калбас, сакар, тшай да печенньӧ. Ӧтувъя
сьӧктаыс кӧнкӧ нёль кило. Быд пакетын куим морт вылӧ лунся сёян. Бӧрӧ кольӧма
сійӧ кадыс, кор походъясӧ вӧлі мунӧны шыдӧс-макаронӧн да кансер банкаясӧн.
Сублиматъяс ёна кокньӧдісны нопъяснымӧс. Гортын сувтлім весі вылӧ ноптӧг и нопйӧн.
Менам нопйӧй – 17 кг, гӧтырлӧн – 13. Быттьӧкӧ абу уна, но кузь пода туйын,
гӧраясӧ изъяс вывті кавшасигӧн быд килограмм нӧшта на сьӧктӧдӧ восьлалӧмсӧ.
Автобусӧн юркарсянь Микуньӧдз, сэсянь
Интаӧдз поездӧн. Кадыс лэбыштіс. Кӧсйи поездын тӧдмасьны – кӧні гӧраясыс, мый
на йылысь тӧдса. Весиг тайӧс эг удит лыддьыны ӧтуввезйысь.
Водзӧ лоӧ на ....
Гӧгӧрвоӧдӧм: Гижӧдсӧ нимта "Манарагаӧн" - сы вӧсна мый, тайӧ гӧраыс медмича, медся аслыспӧлӧс, нимыс мича, и татчӧ волӧмыс медъёна менӧ шензьӧдіс. Манарага - став ветлӧмыслӧн медшӧр могыс, кульминацияыс.
Комментариев нет:
Отправить комментарий