МАНАРАГА. НЁЛЬӦД ЛУН

 НЁЛЬӦД ЛУН. МАНАРАГА ВОЖ

Тэрмасьтӧг садьмим, сёйим, разим палаткаяс, чукӧртім нопъяс. Кодсюрӧ удитісны лэччывны Манарага ю дорӧдз купайтчыны – вӧлӧмаӧсь миян пӧвстын «моржъяс». Ме лэччылі жӧ, но меным тырмымӧн вӧлі кок кӧтӧдыштны.

Тӧла поводдяысь да кынмалӧмъясысь мукӧдыслӧн петӧма герпес, вомдорыс тӧлӧдӧма, а шондісьыс – сотчӧма чужӧм да ныр йыв.

Туйӧ петтӧдз сайӧдім кӧкъямысӧд да сизимӧд (асъя пакет кындзи) лунся сёян пакетъяс. Ошъяс тані шӧйтӧны да, та вӧсна эм кутшӧмкӧ полыштӧм – аддзам-ӧ сэсся?

Нёльӧд лунӧ миянлы колӧ мунны дас кымын километра Манарага горулӧдз.

Мунны вӧлі кокни – вӧраинад ордымыс бура тӧдчӧ. Петім час дасын. Гӧтыркӧд медводдзаяс лыдын восьлалім. Кок висис на Народа из вылӧ ветлӧмысь да Кар-кар перевал вомӧн вуджӧмысь. Ниа вӧраин вежласьӧ нюраинӧн. Ӧтилаын кроссовкиӧй кӧтасис, мен дыш вӧлі сапӧгасьны, и водзӧ муні кӧмтӧг – километра кык кымын. Мукӧдыс веськодя жӧ видзӧдісны, мый ботинкиныс кӧтасьӧ. Мунігӧн бура нин вӧлі тыдалӧ Манарага изйыс. Мича!.... Нинӧм шуны ...

Ӧти косьмӧм няйт гуранті мунігӧн казялі, мый кодкӧ ме моз жӧ кӧмтӧг мунӧма, но кок туйыс зэв ыджыд, и кольӧма на гыжъяссӧ. Мыйлакӧ мукӧдыс, коді миян бӧрся локтіс, тайӧс эз казявны. Ошъяс йылысь сёрнияс кутісны паськавны пыр тшӧкыдджыка.

Шойччыштӧмъясӧн воим вадорӧдзыс, кысянь кайӧ Манарага излань ордым. Тані шойччыштім.

Вадорас зэвтӧма палатка, кӧні бергалісны кык том морт, Уква карысь пӧ. Таӧдзыс ветлӧмаӧсь Манарага из вылӧ, налы изйыд абу «воссьӧма» – вӧлӧма кымӧра. Вӧзйисны миянлы шыдӧс, медым пӧ эз ковмы бӧр нуны, но некод миян пиысь эз матыстчы на дорӧ выльысь.

Манарага ю бокас сулалісны изйысь тэчӧм кык «пач». Кыдзи гӧгӧрвоӧдіс инструктор, тайӧ пӧ «пывсян» – шонтӧны ва, сэсся зэвтӧны вон да мыссьӧны. А ме медводз думышті, мый пачын тшынӧдӧны кыйӧм чери.

Тайӧ сувтланінас унаӧн войколалӧны гӧра вылӧ кайигӧн. Ю бокас сулалӧ пу, кӧні ӧшлӧма пӧвторъяс – сы вылын гижӧма кар нимъяс, кытысь локтӧмны туристъяс. 

Но а миянлы колӧ кайны вывланьджык километра кык вылӧ да корсьны бипура ин. Сергей инструктор гӧгӧрвоӧдіс, мый аски асьныд кыланныд, кыдзи тайӧ кокньӧдас гӧра йылӧ кавшасьӧмсӧ.

Колӧ шуны, мый вӧраинад эм ӧти пакӧсьт – ӧтарӧ гылалӧны пуяс, и мыйлакӧ век – ордым шӧрӧ. Сергей, тӧждысьысь мортыд, медбӧрын муніс да кераліс туй вывсьыс пӧрӧм пуяссӧ – весаліс мукӧдыслы.

Кор воим бипура инӧ, пуксим шойччыны. Коді медводдзаӧн локтіс, кутіс майшасьны – сэтчӧ-ӧ воим, и эз кутны зэвтны палатка. Ме пыр жӧ пукті палатка, чукӧрті пес (ниа кындзи тан быдмӧ кыдз пу, коз), ӧзті бипур – виччысям, кор воас инструктор. Сы дорын вӧліны пӧртъясыс. Бипур удитліс некымынысь ваймыны. Кор Сергей воис, мукӧдыс сӧмын сэки кутісны зэвтны палатка. Тасянь бура нин тыдаліс Манарага излӧн пиньясыс. Мича!... Кыскӧ ас дорас ...

Сёйӧм бӧрын мыськасим-косьтысим, кытшлалім вӧрсӧ. Лагерсянь веськыдладорас аддзим бузгысь шор, кӧні артмӧма купель кодь. Сэтчӧ асыв и рыт котралім купайтчыны. Ӧтчыдысь видзӧдлі, мый гӧтыр пыраліс кӧдзыд ваас, и аслым окота лои тшӧтш. Бузгысьлі некымын секунд вылӧ. Тайӧ тырмымӧн, медым гӧгӧрвоны, мый ог кӧ пет, верма дзик пыр жӧ йизьыны…

Бипур дорын унатор йылысь сёрнитім, тшӧтш и коми мифология да гӧраса духъяс йылысь. Водім водзджык, медым и асывнас чеччыны водз.

Лыддьӧй сідзжӧ: 

Интаӧдз туй, медводдза лун, мӧд лун, КОЙМӧД ЛУН.

Водзӧ лоӧ на ....