воскресенье, 17 декабря 2017 г.

Пожӧмакарын саа лым

Уна во мысти бара ветлі Пожӧмакарӧ коми войтырлӧн конференция вылӧ. Некымын лунӧдз водз са вӧчан завод шыбитӧма сынӧдӧ са - лымйыс пемдӧма. Пыран кӧ керкаӧ, джоджас кольӧны сьӧд визьяс. Тайӧс, гашкӧ, дзик пыр эг и казяв, эз кӧ та йылысь висьтавны йӧзыс. Чуймышті, мый конференция дырйи саӧн сынӧд тшыкӧдӧм йылысь чӧв олісны!




Конференция муніс "Горизонт" культура керкаын. Комын кык делегатысь воӧма 24. Ыджыд жырйыс кажитчис кушӧн.


Кӧть и Сосногорск районын олӧ комиыс этша, нимкодь вӧлі, мый районса администрацияӧн веськӧдлысь В.И. Шомесов ассьыс чолӧмалан кывъяссӧ лыддис комиӧн (сэсся рочӧн). Тадзи жӧ водзмӧстчис "Коми войтыр" ӧтмунӧмса Сосногорск представительствоӧн веськӧдлысь Владимир Артеев вогӧгӧрса удж вӧчӧм йылысь докладын.

Колӧ шуны, мый на бӧрын комиӧн сёрнитісны нӧшта на нёль морт, а налысь сёрнисӧ рочӧдісны уджъёртъясыс. Тайӧ зэв ошкана пример, тӧд вылын кӧ кутны, мый таво мукӧд коми районас, а сідзжӧ Сыктывкарса Эжва районын конференция муніс рочӧн. Вӧлі весиг став позянлуныс да сёрнитчӧмыс, медым вайны Сыктывкарсянь вуджӧдчысьясӧс да синхроннӧя вуджӧдчан аппаратура.

Сьӧлӧм дойъясӧн да восьсӧн петкӧдчис Улыс Одӧсысь нывбаба. Раиса Абудовская юӧртіс, мый налӧн мусир перйысьяслӧн посёлок Сӧвет кадӧ вӧлі сӧвмӧ-дзоридзалӧ: томуловлы сьӧкыд вӧлі веськавны ӧтуволанінӧ (элитнӧйӧн лыддьысьӧма), челядьлы - видзанінӧ. А ӧні пӧ профучилишӧ тупкӧма, эновтӧм общежитие гусьӧн разберитӧны, посёлокӧдз асфальта туй киссьӧма, челядь керка тупкӧма, а уджалысьясыс - 43 морт, ёнджыкасӧ нывбабаяс - кольӧмаӧсь уджтӧг. Ӧні пӧ "мусир перйысьяс" корысьясӧн лоисны. Р.И. Абудовская корис тупкӧм керкаясын восьтыны выль соцобъектъяс. 


Вылыс Изьваысь коми кыв велӧдысь Алёна Третьякова (вужъясыс Кулӧмдін районса Пожӧгдінысь) эскӧдіс, мый челядьлы кажитчӧ пӧ велӧдны коми кыв. Челядь видзанінас чукӧртӧмаӧсь сэтшӧм уна экспонат, мый ӧні мӧвпалӧны восьтыны музей, но оз аддзыны колана жыр. Элясис, мый посёлокысь зэв сьӧкыд петны карӧ, автобус пӧ ветлӧ кыкысь вежоннас. Виччысьӧны Уквасянь Мылдінӧ выль автобус рейсъяс.


Порожскысь Анатолий Рочев таво конференция вылӧ ӧдва вермӧма воны туй абутӧмла. Ковмӧма весиг буранӧн кытсюрӧ мунны. Колян во пӧ Сосногорск администрация кӧсйысьӧма болотоход, но кывсӧ абу и кутӧма. Изьва юпӧлӧнса грездъясысь йӧз пӧ муналӧны удж абутӧмла, некытчӧ сдайтны картупель да тшак-вотӧсъяс, Винла грездын лёкиник ва, зэв лёка уджалӧ гортса телепон да сотӧвӧй связь. Петалӧмаӧсь сиктсаяс субӧтник вылӧ да некод вылӧ надейтчытӧг ас киӧн туй дзоньталӧмаӧсь.

Вӧліны норасьӧмъяс и биаруӧн могмӧдӧм, туй асфальтируйтӧм да пемыд кадӧ уличаяс югзьӧдӧм вылӧ.

Коми кыв видзӧм йылысь гарыштіс быдӧн. Евдокия Рочева шуӧ мый комиясӧс пӧ милӧстыня тшӧктӧны корны, медым велӧдны чужан кывсӧ.

Делегатъяс корисны дзикӧдз бырӧдны йӧзӧс велӧдан министерстволысь 366 номера приказ, мый серти коми кыв ковмис эськӧ велӧдны республикаын сӧмын бать-мам шыӧдчӧмъяс подув вылын. Вӧзйисны, медым коми кывъя морт уджаліс карса администрацияас, а велӧдан управленньӧын коми кывйысь методистыс тӧдіс коми кыв. Казьтыштісны и сійӧ кадсӧ, кор Сосногорск администрацияын уджалысьяс 
велӧдісны коми кыв Коми культура шӧрин бердас.

Йӧз костысь некымынысь кывлі, мый карсӧ шуӧны Пожӧмакарӧн, кӧть став официальнӧй гумагын комиӧн и рочӧн гижсьӧ и лыддьысьӧ Сосногорск. Код тӧдас, гашкӧ, кад кольӧм мысти сэтшӧма велалам та дорӧ, мый Коми республикаса термин да кыв гижанног комиссия вынсьӧдас Пожӧмакар 
кыдзи официальнӧй ним.

Комментариев нет:

Отправить комментарий