Блогйысьӧм серти семинар

"Коми блогысь" республикаса мӧд конкурс юӧртӧм бӧрын Сыктывкарын нуӧдӧма блог восьтӧм серти велӧдан семинар. 

Чукӧртчылім С. Маршак нима челядьлы небӧгаинын, кытчӧ волісны Сыктывкар педколледжса велӧдчысьяс. Медводз висьталышті блог восьтӧм да комиӧн гижны коланлун йылысь, колян вося "Коми блогйысь" конкурс йылысь.
Казьтышті, мый таво конкурсын эм выльпыртӧмъяс. Сідз, вермасны ордйысьны оз сӧмын торъя блогйысьяс, но и быдса котыръяс, шуам, библиотека, музей, школа блог.

Жури кутас бӧрйыны вермысьяссӧ нёль нимпасын (номинацияын):
1. Медбур юӧр;
2. Медся зіль блогйысь;

3. Менам олӧмын коми кыв;

4. Выль ним.

Буретш бӧръя нимпасас кутам бӧрйыны блогйысьӧс, коді бӧръя кадас восьтіс блогсӧ.

А шыӧдчӧмъяссӧ кутам виччысьны 2018 вося урасьӧм 1-ӧд лунӧдз "Коми войтыр" ӧтмунӧмлӧн адресӧ (komi.vojtyr@mail.ru).

Ӧньӧ Лав висьталыштіс коми кывъя сайтъяс да ресуръяс йылысь, кодъяс ковмасны и велӧдысьяслы, и кагульничаяслы, и быдӧнлы, коді босьтчас ӧтуввезйын гижны комиӧн. А сэсся вӧзйис петкӧдлыны, кыдзи позьӧ восьтыны блог. Сюрис и збой ныв - Виолетта Канева, кодлы Ӧньӧ Лав отсаліс регистрируйтчыны да лӧсьӧдны блог blogspot сайтын. Кутам виччысьны выль гижӧдъяс.

Маршак библиотекаын уджалысь, том гижысь Алёна Нестерова юӧртіс аслас блогйысьӧм йылысь. 

Рытпукным помасис тшаюйтӧмӧн.

"Коми блогйысь" конкурс да семинар нуӧдӧны "Коми войтыр" ӧтмунӧмлӧн Сыктывкарса представительство да Коми республикаса национальнӧй политика министерство отсӧгӧн.