Кымын вежлӧг коми кывйын?

Коми семьяяслӧн "Шуда котыр" клуб май тӧлысьӧ бара на чукӧртчыліс. Та пӧрйӧ нуӧдім "Шыпаскуд" квиз да сиим сійӧс коми гижӧд лунлы.

Коми гижӧд лун пасйӧны ода-кора тӧлысь коймӧд шойччан лунӧ. 2021-ӧд воын сійӧ усьӧ 16-ӧд лун вылӧ. Ворсӧм нуӧдім С.Я. Маршак нима челядьлы вужвойтырлӧн небӧгаинын.

Ворсӧмӧ пырӧдчис нёль котыр: Рассыхаевъяслӧн - "Шондібанъяс", Пунегов-Игушев-Мамонтовъяслӧн "Катшасинъяс", Михайловъяслӧн "Михайловъяс", Сукгоевъяслӧн "Вильыш кань".

Ставнас вӧлі 30 юалӧм квайт нырвизьын: кыв, кывсикас, литература, фольклор, туялысьяс да театр йылысь. Быд нырвизьын бӧръя юалӧмыс - коми нӧдкыв, сы вылӧ колӧ вочавидзны сӧмын челядьлы. Командаяслы колӧ вӧлі минута чӧж мӧвпавны да гижны вочакыв торъя бумага вылӧ. Стӧч юалӧмысь сетсьӧ ӧти "син".

Юалӧмъясыс вӧліны и кокниӧсь (кымын вежлӧг коми кывйын? эм абу коми кывйын предлог?), но унджыкыс - сьӧкыдӧсь (кутшӧм воын Виктор Савинлысь нимсӧ сетӧма Драма театрлы?). Либӧ: "Изьва кывйын "сабри" тайӧ ....? ; "Кыдзи шусьӧ Г.А. Юшковлы сиӧм тетрса фестиваль?) и с.в.

Ворсӧм петкӧдліс, мый медвынаыс - "Катшасин" котыр. Налы вичмис меддона козиныс - "Эзысь шабді" премьера вылӧ билет (аттьӧалам Коми Республикаса Вужвойтырлӧн Шылада-драма театрӧс тайӧ козинсьыс). Челядьлы вичмисны юмовторъяс, небӧгъяс да библиотекаӧн дасьтӧм пызанвывса ворсӧмъяс.

Кутам эскыны, мый арнас тырвыйӧ лолалӧмӧн (маскаястӧг) нин да выль мӧвпъясӧн кутам паныдасьлыны да коми челядькӧд ӧтвылысь коллявны кадсӧ - ӧта-мӧдкӧд тӧдмасьӧмӧн, выльторъяс тӧдмалӧмӧн да водзӧ восьлалӧмӧн...