"Мунам водзӧ – воам Доддзӧ" (либӧ гижысь Егор Потапов)

«Мунам водзӧ – воам Доддзӧ». Тайӧ шусьӧгсӧ важӧн нин кывлі. А Додз – тайӧ Кӧрткерӧс районса сикт. Нимыс паныдасьлӧ, кор Кулӧмдінланьӧ туй кузя машинаӧн мунан.

И со сюрис кад волыны татчӧ. Веськӧдчи сыланьӧ эськӧ фольклор чукӧртны. Ӧнія кадӧ Доддзын зіля кыптӧны дачникъяслӧн керкаяс. На пӧвстын коньӧра сайӧдчӧмаӧсь важся коми крестьяналӧн йӧръясыс – пӧлӧс керкаяс да потшӧсъяс, ытшкытӧм турун, гӧртӧм муяс, эндӧм видзьяс.

Додз сиктын Егор Потаповлӧн керка

Фольклор чукӧртӧм йылысь ог гиж – коля институтса отчётъяслы. Тӧдмалі, мый Доддзас чужлӧма гижысь Егор Васильевич Потапов, а ӧні сиктас олӧ сылӧн племянницаыс. Сы дорӧ и вӧзйис ветлыны сиктӧн юрнуӧдысьыс.

Справочникъясысь Е.В. Потапов гижысь йылысь тӧдса этшаник. Чужӧма 1937-ӧд воын, помалӧма сӧмын 7 класс, уджавлӧма лесникӧн, селькорӧн, кувлӧма 1982-ӧд воын – Уллянаса психоневрологическӧй интернатын, кытчӧ веськалӧма юр висьӧм вӧснаыс. Челядь ни гӧтыр абу лӧсьӧдлӧма. Гижӧм кындзи чукӧртлӧма изъяс, монетаяс, серпасасьӧма, фотографируйтчӧма, шылад тэчӧма да гудӧкӧн ворсӧма, радиоӧн тӧдмасьӧма….

Гижны босьтчӧма школаас велӧдчигас на. Йӧзӧдлӧма сӧмын ӧти небӧг – челядьлы «Дзольгӧ шор» кывбуръяса неыджыд чукӧр. Пырӧдчывлӧма гижысьяслӧн семинаръясӧ, но унаысь сылысь нинӧм абу йӧзӧдлӧмаӧсь ни «Войвыв кодзув» ни «Югыд туй». Гижан сямыс улын вӧлӧма ли нӧшта мыйынкӧ помкаыс – меным абу тӧдса.

Кывсис сӧмын, мый сійӧ дасьтывлӧма ачыс кипомысь небӧгторъяс – кывбуръяссӧ мичмӧдӧма серпасъясӧн. Сэсся найӧс дзеблывлӧма гӧбӧчӧ да кытчӧ. Тайӧ пӧ небӧгторъяссӧ ас кадӧ чукӧртӧма Кӧрткерӧс районса библиотекаӧ.

А гижысьлӧн племянницаыс неважӧн юӧртіс меным, мый сылы бара на сюрӧма дядьыслӧн тетрадьясыс. И меным сетіс позянлун наӧн тӧдмасьны. Гӧбӧчас куйлӧмысь тетрадьясыс ёна бусӧссьӧмаӧсь, но ставсӧ лыддьыны позьӧ. Чернилаӧн гижӧмыд бура тӧдчӧ. Кывбуръяса татшӧм терадьыс некымын. Гижӧдъяс улас пуктӧма кад – 1950-ӧд во. Сідзкӧ, Е.В. Потапов муртса помалӧма сизим вося школа.

Унджык кывбурыс вӧр-ва, сӧвет кад да Айму вӧсна Ыджыд тыш йылысь. Кутшӧмкӧ филологическӧй анализ вӧчны ог тэрмась, мед таӧ босьтчасны литература туялысьяс. Мыччӧда сӧмын некымын лист бок, медым тӧдмӧдны.

Торъя листъяс вылын эм кывбуръяс да висьтъяс, ёна на визьниталӧма, абу помӧдзыс эштӧдӧма.

Нимкодь, мый Е.В. Потаповлӧн племянницаыс дась сетны тетрадьяссӧ. И сюрисны нин кывкутысь йӧз, кодъяс босьтасны тетрадьяссӧ дыр видзӧм вылӧ.