Аскӧд венлася

 Тӧв - лыжиӧн котралан кад. А Коми му - нималӧ медваж лямпа аддзӧмӧн, лыжиӧн котралысьясӧн. Та кыдзи и Сыктывкар йитӧ ассьыс олӧмсӧ лыжиӧн котралысьяскӧд.

Помнита школаса физкультура урокъяс, кор колӧ вӧлі сувтны лыжи вылӧ. Сэкъя кадӧ, Сӧветскӧй союз киссигӧн да Рочму чужигӧн, школаын урок кежл вӧлі на сетӧны тӧвнас лыжитӧ. Кыдзи ӧні син водзӧ сувтӧда - лыжияс, бедьяс да ботинкияс век вӧліны жугалан-киссянвыйын (крепленньӧ век вӧлі легӧ). Гашкӧ, та вӧсна лыжи урокъяс ёнасӧ эз кажитчыны. Век вӧлі локта кӧнкӧ бӧръяӧн, дыр мысти. Да и колана спортивнӧй паськӧм сэки эз вӧв. Котралім сійӧ жӧ паськӧмнас, мыйӧн быд лун ветлӧдлім ывлаті, исласим.

Во ли кык, буракӧ, весиг челядь спортшколаӧ ветлӧдлі, кӧні тшӧтш и лыжиӧн котравлі.

Кутшӧмкӧ воӧ рӧдвужлӧн воча вокыс вӧлі мӧдӧдчӧ мӧд регионӧ овны, и сійӧ козьналіс миян семьялы ассьыс лыжисӧ. Абу пу, а пластик сора. Татшӧмнад, майбыр, вӧлі ывлаад петны.

Сэсся университетын велӧдчигӧн тӧвъяснас котравлім жӧ неуна, но сӧмын "пара" дырйи да сетӧм лыжиӧн. Куимысь ли нёльысь артмӧ во чӧжнас.

Та бӧрын ыджыда коставлі. Лыжи вылӧ сувті 2009-ӧд воын "Лямпиада" дырйи (сэки тайӧ нимыс эз на юргы). Аслам эз вӧв да, школасьыс сетісны кутшӧмкӧ лыжи: мый сюри сы бӧрын, кыдзи ставсӧ разӧдісны ыджыдвидзса челядь пӧвстын. Беддьыд ӧдйӧ и сконйыштіс. Бедьтӧг сэки коли да мездісны пожӧгсаяс - буретш колӧ вӧлі кыр йылӧ кайны.

Та бӧрын дзик пыр ньӧби аслым лыжи, мыйӧн пыр на и вӧдитча. Гӧтыр - лыжиӧн котралысь да, сыкӧд и тюръявны кутім. Вӧляникысь лыжиӧн кутісны котравны и челядь. Петавлам быд шойччан лунӧ, поводдяыс кӧ лэдзӧ. Ӧтлаын ветлам и "Сыктывкарса лыжня" ордйысьӧмӧ, и "Лямпиадаӧ".

Во дас сайын Коми наука шӧрин лыжиӧн котралысьяс пӧвстын котыртіс "Академиада"

ордйысьӧм. Быд во жӧ зіли котравны, ёнджыкасӧ аслым, а абу вермӧм да ӧдйӧ котӧртӧм вӧсна. Чайта, вель сьӧкыд ордйысьны накӧд, коді котравлӧма республикаса сборнӧйясын.

Ыджыдджык пиӧй некымын во нин сюртчӧ лыжи секцияӧ, ӧні сылӧн вежоннас витысь тренировка.

Сы вылӧ видзӧдӧмӧн ли тӧвся Олимпиадаса лыжникъяскӧд ӧти доддьӧ пуксьӧм ради, ачым куті тшӧкыдджыка сувтлыны лыжи вылӧ. Мукӧд дырйи витысь вежоннас котрала. И казялі, мый ачым куті венласьны аскӧд. Пыр на рекордъяс вӧліны. Торйӧн нин сы бӧрын, кыдзи лыжиӧс дасьтісны колана ногӧн да спортпаськӧмаси. Мекӧд тшӧтшъяяс эськӧ мӧдарӧ - пыр гежӧдджыка вын-эбӧссӧ песӧны, а ме со водзӧ на ачым аскӧд венлася.